संसदमा अभिव्यक्ति दिएपछि ज्यान मार्ने धम्की आयो: खुस्बु ओली

काठमाडौँ । राष्ट्रिय प्रजातन्त्र पार्टीकी प्रमुख सचेतक खुस्बु ओलीले संसदमा राखेको अभिव्यक्तिपछि आफूलाई ज्यान मार्ने धम्की प्राप्त भएको बताएकी छन्।

संसदमा सनातन राज्यको अवधारणासम्बन्धी विषय उठाएपछि सामाजिक सञ्जालमार्फत आफूलाई लक्षित गर्दै धम्कीपूर्ण सन्देशहरू आएको उनको भनाइ छ। उनले उक्त अभिव्यक्ति प्रस्तुत गर्दा योजनाबद्ध रूपमा विभिन्न प्रकारका धम्कीहरू आएको दाबी गरेकी छन्।

ओलीका अनुसार आफूले संसदमा नेपाललाई सनातन राज्यका रूपमा परिभाषित गर्नुपर्ने धारणा राखेपछि ज्यान मार्ने, यौन हिंसासम्बन्धी तथा आक्रमण गर्ने चेतावनीहरू प्राप्त भएको उल्लेख गरेकी छन्। यस्तो धम्की व्यक्तिगत मात्र नभई सनातनी समुदायप्रति समेत लक्षित भएको उनको टिप्पणी छ।

उनले देशमा गरिबीको अवस्थालाई आधार बनाएर धर्म परिवर्तनका गतिविधि समेत बढाइएको भन्दै सरकारको ध्यानाकर्षण गराएकी छन्। संसदमा उठाइएका विषयकै कारण यस्ता धम्की आउनु गम्भीर विषय भएको उनको भनाइ छ।