इजरायली आक्रमणका कारण गाजामा हालसम्म ७० हजारभन्दा बढी मारिए : हमास

एजेन्सी । इजरायलले गाजामा गरेको सैन्य कारबाहीमा परी हालसम्म ७० हजारभन्दा बढीले ज्यान गुमाएका छन् । बीबीसीका अनुसार हमासद्वारा सञ्चालित स्वास्थ्य मन्त्रालयले यस्तो जानकरी दिएको हो ।

इजरायल र हमासबीच १० अक्टोबरदेखि युद्धविराम लागु गरिएको छ । तर, मृत्यु हुनेको आँकडा भने लगातार बढिरहेको छ ।

इजरायलले भने युद्धविराम उल्लंघन भएकाले केही क्षेत्रमा हवाई आक्रमण गरेको दाबी गरेको छ । थुप्रै शवहरूलाई भग्नावशेसबाट निकाल्न बाँकी रहेको बीबीसीले उल्लेख गरेको छ ।

गाजाको स्वास्थ्य मन्त्रालयलाई उद्धृत गर्दै बीबीसीले हालसम्म मृतकहरूको संख्या ७० हजार १०० पुगेको जनाएको छ । त्यसमध्ये ३५० जनाभन्दा बढीको मृत्यु १० अक्टोबरको युद्धविरामपछि भएको थियो ।

७ अक्टोबर सन् २०२३ मा इजरायलको दक्षिणी इलाकामा हमासले आक्रमण गरेको थियो । उक्त आक्रमणमा परी करिब १२०० मानिसहरू मारिएका थिए । त्यस्नै २५१ लाई बन्धक बनाइएको थियो । त्यसको जवाफमा इजरायली सेनाले गाजामा कारबाही सुरु गरेको थियो ।