विभिन्न संरचनागत मागसहित जनमत पार्टीको प्रदर्शन

काठमाडौँ । जनमत पार्टीले संघीय संरचनासम्बन्धी विभिन्न माग अघि सार्दै सोमबार काठमाडौँको माइतीघर क्षेत्रमा प्रदर्शन गरेको छ।

पार्टीले यसअघि भएको आठबुँदे सहमतिलाई कार्यान्वयन गर्नुपर्ने माग गर्दै प्रदेशहरूलाई पूर्ण अधिकारसहितको स्वायत्त संरचनाका रूपमा स्थापित गर्नुपर्ने धारणा सार्वजनिक गरेको हो। प्रदर्शनमार्फत कर्मचारी प्रशासन र स्थानीय तहलाई प्रदेश सरकारको अधिकार क्षेत्रभित्र राख्नुपर्ने मागसमेत उठाइएको छ।

जनमत पार्टीले प्रमुख जिल्ला अधिकारी तथा प्रहरी प्रशासनलाई पनि प्रदेश सरकारअन्तर्गत सञ्चालन गर्नुपर्ने व्यवस्था गर्न आग्रह गरेको छ। त्यस्तै, नेपाली सेनामा मधेशी र थारु समुदायको सामूहिक सहभागिता सुनिश्चित गर्न, जनसंख्याको अनुपातलाई आधार मानेर निर्वाचन क्षेत्र निर्धारण गर्न तथा वैदेशिक रोजगारीसँग सम्बन्धित समस्याको समाधान गर्नुपर्ने माग पनि प्रस्तुत गरिएको छ।

कृषि क्षेत्रका सवाल उठाउँदै प्रदर्शनकारीहरूले किसानलाई आवश्यक मलखाद समयमै उपलब्ध गराउन र सहजरूपमा कृषि ऋण प्राप्त हुने व्यवस्था गर्न सरकारसँग माग गरेका छन्। साथै, चुरे क्षेत्रको दोहन तथा अतिक्रमण नियन्त्रण गर्न प्रभावकारी कदम चालिनुपर्ने विषय पनि उनीहरूले उठाएका छन्।