न्यायालयमाथिको आक्रमण कानुनी व्यवस्था खलबल्याउने षडयन्त्र : शंकर पोखरेल

दाङ । नेकपा एमालेका महासचिव शंकर पोखरलले जेन–जी आन्दोलनका नाममा न्यायालयमाथि आक्रमण गरेर नेपालको कानुनी व्यवस्थालाई खलबल्याउने षड्यन्त्र भएको टिप्पणी गरेका छन् ।

प्रेस चौतारी दाङले बिहीबार गरेको पत्रकार सम्मेलनमा महासचिव पोखरेलले आन्दोलनका क्रममा न्यायालयमाथिको आक्रमण सामान्य नभएको भन्दै नेपालको कानुनी व्यवस्थालाई खलबल्याउने षड्यन्त्रको परिणाम भएको टिप्पणी गरेका हुन् ।

'जेन–जी आन्दोलन दबाउन न्यायालयको कुनै भूमिका हुँदैन पनि आक्रमण गरेर कानुनी व्यवस्थालाई खलबल्याउने षड्यन्त्र भयो’, पोखरेलको भनाइ छ । उनले जेन–जी आन्दोलनमा उठाइएका माग जायज भएको उल्लेख गर्दै उक्त आन्दोलनमा नवयुवाको आन्दोलनमा राष्ट्र विरोधी स्वार्थी तत्त्वको घुसपैठ भएको बताए ।

पत्रकार सम्मेलनमा महासचिव पोखरेलले वर्तमान सरकार एनजीओ र आइएनजीओको भएको समेत दाबी गरे । सरकारले गैह्र सरकारी संस्थालाई जेन–जी आन्दोलनको स्टेक होल्डर बनाएको भन्दै नेपालको संविधानले गैह्र सरकारी संस्थालाई आन्दोलनको स्टेक होल्डर बन्ने परिकल्पना नगरेको पोखरेलको भनाइ छ । 

आन्दोलनका नाममा प्रहरीका हतियार लुटिएको र कैदीहरू बाहिर रहेकाले असुरक्षा बढेको भन्दै पोखरेलले त्यसले चुनावमा त्रास फैलाउने बताए ।