लुटपाट र विध्वंसमा संलग्न जोसुकैलाई कारबाही हुनुपर्छ : शंकर पोखरेल

काठमाडौं । नेकपा एमालेका महासचिव शंकर पोखरेलले भदौ २३ र २४ गते भएको जेन–जी आन्दोलन सम्बन्धी लुटपाट, आगजनी र विध्वंसका घटनामा जोसुकै संलग्न भए पनि कारबाही हुनुपर्ने बताएका छन् ।

उनले सामाजिक सञ्जाल फेसबुकमा लेखेका छन्– ‘लुटपाट, आगजनी र विध्वंसमा संलग्न आपराधिक जत्थाकाे विरोध गर्न नसक्नेहरूले अहिले एमालेको नाम जोड्न थालेछन् ।’

पोखरेलले ती घटनामा संलग्न सबैलाई कानूनी दायरामा ल्याउनुपर्ने बताएका हुन् । ‘राष्ट्रद्रोही हिंसात्मक कुकर्ममा संलग्न जो कोही हुन्, सबैलाई कडा कारबाही गरौँ, देश जलिरहेको बेला आरोपप्रत्यारोप होइन, सत्य र न्यायको वकालत गरौँ’, उनले भनेका छन् ।

उनले हिंसाका घटनाप्रति स्पष्ट दण्ड र न्याय सुनिश्चित गर्नुपर्नेमा जोड दिएका छन् । आन्दोलनका क्रममा आफ्नो घर जलाउन एमालेका कार्यकर्ता आएको दाबी नेपाली कांग्रेसका महामन्त्री गगन थापाले लगाएका थिए ।

जेन–जी आन्दोलनका क्रममा भएको क्षति र सवारीसाधन, व्यापारिक प्रतिष्ठान तथा सार्वजनिक सम्पत्तिमा पुगेको नोक्सानीलाई लिएर अहिले कारबाहीका लागि दबाब बढिरहेको छ ।  आन्दोलनका क्रममा विध्वंसमा संलग्न भएको भन्दै कलाकारहरूमाथि पनि छानबिन हुनुपर्ने आवाज बढिरहेको छ ।

हालसम्म हिंसा र विध्वंससम्बन्धी घटनाबारे छानबिनका लागि गठित आयोगले प्रतिवेदन दिएको छैन । तर प्रहरीले २ सय ५० भन्दा धेरैलाई पक्राउ गरेर मुद्दा चलाइरहेको छ । अकल्पनीय विध्वंस र हिंसाबारे  अहिले राजनीतिक आरोपप्रत्यारोप चलिरहेको छ ।