आगजनीपछि आइतबारदेखि सञ्चालन हुँदै उच्च अदालत तुलसीपुर

तुलसीपुर । दाङस्थित उच्च अदालत तुलसीपुरले आइतबारदेखि मुद्दा दर्ता तथा सुनुवाइको काम सुरु गर्ने भएको छ।

अदालतका रजिस्ट्रार यमप्रसाद बाँस्कोटाका अनुसार मुद्दा दर्ता, रिट, निषेधाज्ञाको निवेदन, मुलुकी देवानी कार्यविधि संहिता २०७४ को दफा १५७ र मुलुकी फौजदारी कार्यविधि संहिता, २०७४ को दफा ७३ बमोजिमका निवेदन दर्ता र सुनुवाइ सुरु हुनेछ।

यसअघि बन्दीप्रत्यक्षीकरणको निवेदन लिने मात्रै गरिएको थियो।

चालु अवस्थामा रहेका मुद्दाका काम-कारबाही नियमित गर्ने र नयाँ पुनरावेदन पत्र दर्ता गरी सेवा नियमित गर्ने सम्बन्धमा अर्को सूचना प्रकाशन गरेर मात्रै जानकारी दिइने रजिस्ट्रार बाँस्कोटाले बताए।

जेनजीको आन्दोलनका क्रममा अदालतमा भएको आगजनीले नियमित सेवा अगाडि बढ्न सकेको थिएन।