भिजिट भिसा प्रकरणको अनुसन्धान जारी हुँदा पक्ष विपक्षमा जुहारी

काठमाडौ । भिजिट भिसाको आवरणमा त्रिभुवन अन्तर्राष्ट्रिय विमानस्थल अध्यागमन कार्यालयमा अनुचित लेनदेनको आशङ्कापछि अख्तियार दुरुपयोग अनुसन्धान आयोगले विगत दुई सातादेखि विस्तृत अनुसन्धान गरिरहेको छ ।

भ्रष्टाचारजन्य गतिविधि, अनियमितता, पदीय दुरुपयोगबारे निष्पक्ष अनुसन्धान गर्ने संवैधानिक निकाय अख्यिार दुरुपयोग अनुसन्धान आयोगकै कामकारबाहीलाई नै प्रभावित पार्ने गरी सार्वजनिक मञ्चमा पक्ष, विपक्षमा चर्को बहस भइरहेको छ ।

अध्यागमन कार्यालयका कर्मचारीको मिलेमतो हुने गरेको अनुचित लेनदेनमा गृह मन्त्रालय नै जवाफदेही हुनुपर्ने जिकिर गर्दै प्रमुख प्रतिपक्षी गठबन्धनले गृहमन्त्री रमेश लेखकको राजीनामा माग गर्दै प्रतिनिधि सभा अवरुद्ध पारिरहेका छन् ।

संविधानले नै निष्पक्ष अनुसन्धानको जिम्मेवारी तोकेको अख्तियारबाट भइरहेको छानबिनकै क्रममा प्रतिनिधि सभासम्म भइरहेको बहसलाई कानुनका जानकारले भने निको मानिरहेका छैनन् । स्वयम् अख्तियार दुरुपयोग अनुसन्धान आयोगसमेत अनुसन्धानलाई नै प्रभावित पार्ने गरी भइरहेको पक्ष विपक्षको जुहारीप्रति असहमत देखिएको छ । गोरखापत्रमा खबर छ ।