ट्रकले ठक्कर दिँदा मोटरसाइकको पछाडि बस्नेको मृत्यु, चालक घाइते

मकवानपुर । मकवानपुरको मनहरीमा ट्रकको ठक्करबाट मोटरसाइकलमा सवार एकजनाको मृत्यु भएको छ। दुर्घटनामा अर्का एकजना घाइते भएका छन्।

पूर्वपश्चिम राजमार्गमा पर्ने मनहरी ७ मा पश्चिबाट हेटौँडातर्फ आउँदै गरेको ना १६ प ३१८१ नम्बरको मोटरसाइकललाई सोही दिशातर्फ आउँदै गरेको ना ६ ख ४०५५ नम्बरको ट्रकले ठक्कर दिँदा दुर्घटना भएको हो।

दुर्घटनामा मोटरसाइकलको पछाडि बसेका चितवन रत्ननगर १६ पिठुवाका ५६ वर्षीय नीमबहादुर थापाको मत्यु भएको जिल्ला प्रहरी कार्यालय मकवानपुरले जनाएको छ। 

दुर्घटनामा गम्भीर घाइते भएका थापाको उपचारका क्रममा मृत्यु भएको हो। दुर्घटनामा सोही ठाउँका मोटरसाइकल चालक ५५ वर्षीय रामजी गौतम घाइते भएका छन्। उनलाई थप उपचारका लागि चितवन रिफर गरिएको प्रहरीले जनाएको छ। 

ठक्कर दिने ट्रक र त्यसका चालकलाई प्रहरीले नियन्त्रणमा लिएको छ।