भूमिहीन र सुकुम्वासीलाई लालपुर्जा वितरण कार्य निरन्तर रहन्छ: मन्त्री रावल

काठमाडौँ । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले भूमिहीन तथा सुकुम्वासीको समस्या समाधानलाई सरकारले प्राथमिक एजेन्डाका रूपमा अघि बढाइरहेको बताएकी छन्।

राष्ट्रिय सभाको विनियोजन विधेयक, २०८३ सम्बन्धी छलफलमा सांसदहरूले उठाएका प्रश्नहरूको जवाफ दिँदै मन्त्री रावलले भूमिहीन नागरिकलाई जग्गा वितरण गर्ने सरकारी नीति कार्यान्वयन चरणमा रहेको जानकारी दिइन्। उनका अनुसार सरकारले बर्दियाबाट लालपुर्जा वितरणको प्रक्रिया सुरु गरिसकेको छ र यसका लागि आवश्यक बजेटको अभाव नहुने व्यवस्था गरिएको छ।

उनले वैज्ञानिक भूमिसुधार, उत्पादनमुखी भूमि व्यवस्थापन तथा स्थानीय तहको संस्थागत सुदृढीकरणलाई पनि सरकारले समानान्तर रूपमा अघि बढाइरहेको उल्लेख गरिन्।

मन्त्री रावलका अनुसार हालसम्म करिब १२ लाख भूमिहीन तथा सुकुम्वासीले जग्गा प्राप्तिका लागि निवेदन दिएका छन्। सो कार्यलाई व्यवस्थित बनाउन सरकारका तर्फबाट रु. ६१ करोड ३० लाख विनियोजन गरिएको उनले जानकारी दिइन्।