गठ्ठाघर दुर्घटनाकाे गम्भीरतापूर्वक छानबिन गर्न गृहमन्त्रीको निर्देशन

काठमाडौं । गृहमन्त्री रमेश लेखकले भक्तपुरकाे गठ्ठाघरमा भएकाे सवारी दुर्घटनाकाे गम्भीरतापूर्वक छानबिन गर्न प्रहरी महानिरीक्षक (आइजीपी)लाई निर्देशन दिएका छन् । गृहमन्त्री लेखकले गम्भीरतापूर्वक दुर्घटना कारण खाेज्न आइजीपी बसन्त कुँवरलाई निर्देशन दिएका हुन् । 

गठ्ठाघरमा भएकाे दुर्घटनाबारे दु:ख व्यक्त गर्दै उनले भने "गठ्ठाघरकाे दुर्घटनामा के भएकाे हाे ? दुर्घटना हुनुमा कसैकाे गल्ती छ कि ?  यसमा हाम्रो पुलिस फाेर्सकाे गल्ती छ कि ? यसकाे गम्भीरतापूर्वक छानबिन गर्नुहाेस् ।" 

बिहीबार दिउँसो भक्तपुरको गठ्ठाघर चोकनजिकै ट्रकले ठक्कर दिँदा स्कुटर चालकको घटनास्थलमै मृत्यु भएको थियाे ।  ना ६ ख २१७३ नम्बरको ट्रकले बा३९प ८९४४ नम्बरको स्कुटरलाई ठक्कर दिँदा स्कुटर चालक ओखलढुंगा स्थायी घर भएका उत्तम कोइरालाको मृत्यु भएको प्रहरीले जनाएको छ । 

ट्रक चालक घटनास्थलबाट फरार भए पनि बिहीबार साँझ काठमाडौंको नयाँ बानेश्वर वृत्त तीनकुनेले पक्राउ गरी थिमि वृत्तको जिम्मा लगाएको छ ।