जनकपुरमा उम्मेदवारको बुवा माथि धारिलो हतियार प्रहार गरि आक्रमण

जनकपुर । आसन्न स्थानीय तह निर्वाचन नजिकिदैं गर्दा जनकपुरमा एक उम्मेदवारको बुवामाथि धारिलो हतियार प्रहार गरि आक्रमण गरिएको छ । 

नेकपा (माओवादी केन्द्र) का तर्फबाट धनुषाको कमला नगरपालिका–१ को वडाध्यक्ष पदमा उमेदवारी दिएका सर्वदेव यादवका बुवा ७० वर्षीय चन्द्रनारायण यादवमाथि बुधबार राति धारिलो हतियार प्रहार गरिएको हो । गम्भीर घाइते भएका यादवको अहिले प्रादेशिक अस्पताल जनकपुरधाममा उपचार भइरहेको छ ।

मग्राहा स्थित घरमा वडाध्यक्षका उमेदवार सर्वदेवलाई आक्रमण गर्न गएको अज्ञात समूहले ढोका फोड्न नसकी बाहिर बरन्डामा सुतेका उनका बुवालाई आक्रमण गरेको हुन सक्ने प्रहरीको अनुमान छ । घाइते यादवको शरीरका विभिन्न भागमा खुकुरी र चक्कु प्रहार गरिएको उनका नाति सुरेन्द्र यादवले बताए ।