एमाले–माओवादी मिलाउने प्रयास, नेताहरु चीनको शरणमा

काठमाडौं । शुक्रबारदेखि सुरु भएको नेपाली काँग्रेसको बैठकमा नेताहरु दुइ भागमा विभाजित बने । एक पक्ष वर्तमान सत्ता गठबन्धनसँगै मिलेर चुनावमा जानुपर्ने पक्षमा उभिए भने अर्को पक्षचाहिँ काँग्रेस एक्लै चुनावमा जानुपर्ने पक्षमा उभिए । प्रधानमन्त्री शेरबहादुर देउवाले यही विषयमा बैठकमा आक्रामक रुपमा प्रस्तुत भए । चितवनका नेता तथा हालैको महाधिवेशनबाट केन्द्रीय सदस्य बनेका दिनेश कोइरालासँग देउवा आक्रोशित बनेका हुन् । 

कोइरालाले  गठबन्धनको विपक्षमा धारणा राखेपछि कांग्रेस सभापति शेरबहादुर देउवा आक्रोशित बनेका थिए । देउवाले सक्छौ भने एक्लै क्याम्पसको चुनाव देखाउ भन्दै आक्रोश पोखेका थिए । ‘क्याम्पसमा चुनाव जित्नुहुन्न। कहीँ कतै जित्नुहुन्न। खालि हामी बलियो छौं भन्नुहुन्छ। अनि गठबन्धनको विरोध गर्नुहुन्छ’, देउवाले भनेका थिए । 

‘एक्लै भिड्नुपर्छ। यदि कहीँ गठबन्धन गर्नुर्पयो भने स्थानीय स्तरबाटै त्यहाँको आवश्यकता र चाहना छलफल गरेर मात्रै गर्नुपर्छ। केन्द्रबाट लादिनुहुँदैन’ कोइरालाको भनाइ थियो।उनले एमाले र माओवादी फुटेकाले काँग्रेस नै बलियो भएको धारणा राखेका थिए । ‘यतिबेला पनि कांग्रेस सिंगल लडेन भने कहिले लड्ने ?’ भन्ने उनको प्रश्न थियो । काँग्रेसका गगन थापासहित शेखर कोइरालालगायत कुनै पनि हालतमा गठबन्धन गर्न नहुने कित्तामा छन् । 

काँग्रेसभित्रै चुनावी गठबन्धनको विषयमा कचिंगल रहेका बेला माओवादीकै केही नेता पनि एमालेसँग गठबन्धन बनाउन लागिपरेको खुलेको छ । माओवादीका अध्यक्ष प्रचण्डले आफ्नै तागतका बलमा चुनावमा जानुपर्ने बताइरहँदा सो पार्टीका एउटा समूह भने अन्तर्राष्ट्रिय लबिइङमै लागेको खुलेको हो । नेता वर्षमान पुनसहितका नेताहरु काँग्रेससँग नभइ एमालेसँग गठबन्धन गर्नुपर्ने भनेर लबिइङमा लागिपरेका हुन् । 

पुन अहिले त्यसकै लबिङमा चीनमा रहेका छन् । उपचारको नाममा श्रीमती ओनसरी घर्ती र पार्टी नेता देव गुरुङसँगै चीनमा रहेका उनी राजनीतिक लबिङकै लागि त्यसतर्फ गएको स्रोतको भनाइ छ । विगतमा कृष्ण बहादुर महराले जस्तै चिनियाँ नेताहरुसँग अहिले पुनले राम्रो सम्बन्ध बनाएको बताइएको छ । उपचारको फलोअप भनिएपनि उनी कम्निङ सम्मेलनमा सहभागी हुने र त्यहीबाट चीनसँग उच्चस्तरीय छलफल गर्ने स्रोतको भनाइ छ । स्रोतका अनुसार पुनले गठबन्धनका लागि एमालेसँग पनि एकचरण छलफल गरेका थिए भने अहिलेको गठबन्धन भत्काउनका लागि एमाले अध्यक्ष केपी ओली पनि सकारात्मक रहेका छन् । 
ओलीकै चाहना अनुसार एमाले उपाध्यक्ष विष्णु पौडेल समेत चीन गएका थिए । पौडेल शुक्रबार स्वदेश फर्किसकेका छन् । 

चीनको कुन्मिङमा आयोजित एक कार्यक्रममा सहभागी हुन भन्द पौडेल नेतृत्वको प्रतिनिधिमण्डल गत सोमवार चीन गएको थियो ।सो प्रतिनिधिमण्डलमा उपाध्यक्ष पौडेलसहित स्थायी कमिटी सदस्य काशीनाथ अधिकारी, लेखा आयोगका अध्यक्ष पुष्पराज कँडेल र केन्द्रीय सदस्य मीना रखाल थिए । सो क्रममा पौडेललगायतले वामपन्ती गठबन्धन बनाउने विषयमा चिनियाँ नेताहरुसँग छलफल गरेको स्रोतका दावी छ।  

नेपालको संसदबाट एमसीसी पारित गराउन सन्दर्भमा चीन विपक्षमा रहेको थियो । चीनको चर्को लबिङका बीच पनि काँग्रेसको जोडबलमा एमसीसी पारित भएको थियो । उसो त चीन र काँग्रेसको सम्बन्ध राम्रो छैन भने वर्तमान देउवा सरकारले चीनसँगको सीमा विवाद उचाल्दै आएको छ ।सीमा विवाद उचालेको विषय एमालेको हालै सम्पन्न केन्द्रीय समिति बैठकमा पनि उठेको थियो । अध्यक्ष केपी ओलीको राजनीतिक प्रतिवेदनमा विवाद नै नभएको सीमासम्बन्धी विषय वर्तमान सरकारले उचालेको भन्दै आलोचना गरिएको छ । 

ओलीमाथि अनेक आरोप लागेपनि उनले राजनीतिक प्रतिवेदनमै चीनसँग सीमा विवाद नभएको र चीनप्रति नरम देखिएका छन् । यसले ओली चीनसँग सकारर्य गरेर अघि बढ्न इच्छुक रहेको देखिन्छ । यही बीचमा एमाले नेताहरुको चीन भ्रमणलाई अर्थपूर्ण रुपमा हेरिएको छ।  

यहीबीचमा माओवादीको एक समूह चीन जानुले थप अन्योलता र चासो सिर्जना भएको छ।  एकसाथ चासो र अन्योलता यसअर्थमा कि सत्ता गठबन्धनबीच नै तालमेलको निर्णय नभएपनि प्रयास भइरहँदा एमाले र माओवादीबीचको गठबन्धनको लागि किन प्रयास भयो र त्यसमा माओवादी र एमालेकै नेताहरु किन सल्बलाए, प्रश्न खडा भएको छ । शुक्रबार मात्रै चिनियाँ विदेशमन्त्री वाङ यी पनि नेपाल आएका छन् भने उनले पनि वामगठबन्धनमा जोड दिने सम्भावना उत्तीकै छ ।