प्रदीप ज्ञवाली नै एमाले प्रवक्ता : योगेश भट्टराई

काठमाडौँ । प्रमुख प्रतिपक्षी नेकपा एमालेका सचिव योगेशकुमार भट्टराईले हाललाई पार्टी प्रवक्ता प्रदीप ज्ञवाली नै रहेको बताएका छन्। 

सर्वोच्चको फैसला अनुसार एमाले जेठ २ मा फर्किएको अवस्थामा प्रचार विभाग प्रमुख रहेका भट्टराईले शनिबार ललितपुरको च्यासलस्थित तुल्सीलाल स्मृति प्रतिष्ठानमा बसेको स्थायी कमिटी बैठकपछि यसो भनेका हुन्। भट्टराईले अहिलेको अवस्थामा आफू एमाले प्रचार विभाग प्रमुख र ज्ञवाली प्रवक्तामा यथावत रहेको पनि जानकारी दिए। 

भट्टराईले अबको बैठकबाट प्रवक्तामा ज्ञवालीलाई निरन्तरता दिने वा आफ्नोबारे निर्णय गर्न सक्ने उनले जानकारी दिए। 
भट्टराईले २०७५ जेठ २ अघि एमालेमा प्रवक्ता पद नरहेको पनि बताए। तर नेकपा खारेज भएर एमालेको बैठकमा आफूहरु सहभागी नभएको अवस्थामा प्रवक्ता पद सिर्जना गरेर ज्ञवालीलाई जिम्मेवारी तोकिएको पनि उनले बताए।