देउवा विरोधी खेमामा सहमति प्रयास

पत्रपत्रिकाबाट

शनिबार, २६ असार २०७८, ०७ : ४७
देउवा विरोधी खेमामा सहमति प्रयास

काठमाडौं । नेपाली  कांग्रेस संस्थापन इतर पक्षका नेताहरूले महाधिवेशनमा साझा उम्मेदवार तय गर्न सहमतिको पहल थालेका छन् ।

CG Developers Tansen Cement box

नेता अर्जुननरसिंह केसीको पहलमा शुक्रबार संस्थापन इतर समूहबाट नेतृत्वका आकांक्षीलाई एक ठाउँमा भेला गराएर सहमतिमा एकमात्र उम्मेदवार तय गर्न छलफल गरिएको छ । केसी स्वयंले पनि पार्टीको १४औं महाधिवेशनमा आफूलाई सभापतिको आकांक्षीका रुपमा प्रस्तुत गर्दै आएका छन् ।

संस्थापन पक्षबाट शेरबहादुर देउवा, विमलेन्द्र निधि र गोपालमान श्रेष्ठले नेतृत्वका लागि आकांक्षा व्यक्त गरेका छन् । संस्थापन इतर पक्षबाट भने नौजनाले सभापतिमा दाबी गर्दै आएका छन् ।

संस्थापन इतर पक्षबाट नेतृत्व दाबी गर्नेमा नेता रामचन्द्र पौडेल, महामन्त्री शशांक कोइराला, पूर्वमहामन्त्री प्रकाशमान सिंह र कृष्णप्रसाद सिटौला, पूर्वसहमहामन्त्रीहरू रामशरण महत र अर्जुननरसिंह केसी, केन्द्रीय सदस्यहरू शेखर कोइराला, सुजाता कोइराला र कल्याण गुरुङ छन् ।

संस्थापन इतर पक्षबाट सभापतिका आकांक्षी गुरुङबाहेक अन्य सहभागी बैठकमा सबैले नेतृत्वमा आआफ्नो दाबी प्रस्तुत गर्दै औचित्य पुष्टिको प्रयास गरेका थिए ।

बैठकमा सबैले आफू नै आगामी सभापतिका लागि अब्बल भएको दाबी गरे पनि सिटौलाबाहेक अन्यले संस्थापन इतर पक्षबाट सहमतिमा साझा उम्मेदवार तय गर्नुपर्नेमा जोड दिएका थिए ।

संस्थापन इतर समूहबाट सभापतिमा एउटामात्र उम्मेदवार बनाउन नसके नेतृत्वमा पुग्न नसकिने सबै आकांक्षीले स्वीकार गरेको एक नेताले बताए । १३औं महाधिवेशनमा तत्कालीन संस्थापन पक्षबाट विद्रोह गर्दै सभापतिको उम्मेदवार बनेका सिटौलाले स्वस्थ प्रतिस्पर्धा गर्नुपर्नेमा जोड दिएका थिए ।

महाधिवेशन आउन अझै समय बाँकी रहेकाले अहिले नै हतार गर्नुपर्ने आवश्यकता नरहेको भन्दै उनले सहमतिभन्दा पनि स्वस्थ प्रतिस्पर्धाबाट छानिने नेतृत्वले संगठन चलायमान बनाउन सक्ने धारणा राखेको स्रोतको दाबी छ ।

नेताहरूबीच १४औं महाधिवेशनलाई निष्पक्ष, स्वतन्त्र बनाउनेदेखि मुलुकको समग्र राजनीतिक अवस्थाबारे छलफल भएको थियो । नागरिक दैनिकमा खबर छ । 

प्रतिक्रिया दिनुहोस