झलनाथ र माधव सहित ११ जना सांसद एमालेको साधारण सदस्यबाटै निष्कासित (नामावलीसहित)

काठमाडौं । नेकपा एमालेले वरिष्ठ नेता झलनाथ खनाल र माधवकुमार नेपालसहित ११ जनलाई पार्टीको साधारण सदस्य समेत नरहने गरी निष्काशन गरेको छ । सोमबार बालुवाटारमा बसेको स्थायी समिति बैठकले खनाल नेपाल सहितका स्पष्टीकरण सोधिएका ११ नेतालाई पार्टीबाट निष्काशन गरेको हो ।

खासगरी सर्वोच्च अदालतबाट ब्यूँतिएको एमालेमा ह्वीप उल्लंघन, विपक्षीसँग मिलेर चुनावमा आफ्ना नेतालाई पराजित र विपक्षीकै नेतृत्वमा सरकार बनाउने कोशिश गरेको आरोप लगाएर नेपालसहित ११ जना सांसदलाई पार्टीको साधारण सदस्यसमेत नरहने गरी निस्कासन गर्ने निर्णय ओलीले गरेका छन् ।

उनले सोमबार बालुवाटारमा आफू पक्षीय स्थायी कमिटी बैठकमार्फत पछिल्लो पटक आफ्नो स्पष्टीकरणको जबाफ नदिएका सासदहरुलाई पार्टीबाट निष्कासन गर्ने निर्णय गरेका हुन् ।

शनिबार बालुवाटारमा बसेको उनी पक्षीय पार्टीको स्थायी कमिटी बैठकले विपक्षीलाई साथ दिएको आरोपमा ११ जना सांसदहरुलाई स्पष्टीकरण सोध्ने र उनीहरुको जबाफ चित्तबुझ्दो नआए त्यसै अनुसार कारवाही प्रक्रिया अघि बढाउने निर्णय गरेको थियो ।

पार्टी सदस्यबाटै निष्कासन गरिएका नेताहरूमा माधवकुमार नेपाल, झलनाथ खनाल, भीमबहादुर रावल, मुकुन्द न्यौपाने, रामकुमारी झाँक्री, सरला यादव, पुष्पाकुमारी कर्ण, कलिला खान, निरादेवी जैरु, लक्ष्मीकुमारी चौधरी र कल्याणीकुमारी खड्का रहेका छन् । पार्टीविरुद्ध गतिविधि गरेकोमा सोधिएको स्पष्टीकरण चित्तबुझ्दो नभएकाले पार्टीबाटै निष्कासन गर्ने निर्णय गरिएको छ ।