कोभिडको महामारी नियन्त्रण र उपचारका लागि लुम्बिनी प्रदेशलाई  सरकारले पठायो ४७ करोड

रुपन्देही । कोभिडको महामारी नियन्त्रण र उपचारका लागि अर्थमन्त्रालयले लुम्विनी प्रदेशमा करिव ४७ करोड ७ लाख ८५ हजार निकासा दिने भएको छ । प्रदेशका ४ वटा अस्पतालमा अक्सिजन प्लान्ट, भेन्टिलेटर र अक्सिजन ट्यांक निर्माणका लागि ३४ करोड ६० लाख र ३ वटा अस्पतालमा एचडीयू स्थापनाका लागि १० करोड ४७ लाख ८५ हजार रुपैयाँ निकासा दिने निर्णय भएको हो ।

अर्थमन्त्रालयका अनुसार बुटवलको लुम्विनी प्रादेशिक अस्पताललाई ९ करोड ८० लाख, भेरी अस्पताल नेपालगन्जलाई १५ करोड, राप्ती स्वास्थ्य विज्ञान प्रतिष्ठान दाङलाई ६ करोड ८० लाख र भिम अस्पताल भैरहवालाई ३ करोड रकम दिन लागिएको हो ।

यस्तै एचडीयू स्थापनाका लागि लुम्विनी प्रादेशिक अस्पतालका लागि ६ करोड २५ लाख ४० हजार, तुल्सीपुर अस्पताल दाङलाई ३ करोड १२ लाख ७० हजार र पश्चिम नवलपरासीको पृथ्वीचन्द्र अस्पताललाई १ करोड ९ लाख ७५ हजार रुपैयाँ उपलब्ध गराउने निर्णय भएको हो ।

उक्त रकमबाट लुम्विनी प्रादेशिक अस्पतालमा २ युनिट तुल्सीपुर अस्पतालमा १ युनिट र पृथ्वी चन्द्र अस्पतालमा १० एचडीयू शय्या निर्माण हुनेछ । कोभिडका बिरामीहरुको उपचार गरी रहेका प्रदेशका यी अस्पतालहरुमा भेन्टिलेटर र अक्सिजनको अभावमा कोभिड संक्रमणका बिरामीहरुको दिनप्रति दिन ज्यान गइरहेको थियो । निकासामा चासो देखाएका थिए ।

अर्थमन्त्रालयले आइतवार कोभिड–१९ को नियन्त्रण र उपचारका लागि देशभरका २६ वटा केन्द्रीय अस्पताल र ९ वटा प्रादेशिक गरी ३५ वटा अस्पतालमा अक्सिजन प्लान्ट, भेन्टिलेटर र अक्सिजन ट्यांक निर्माणका लागि द्रूत कार्ययोजनाका साथ खरिद प्रक्रिया अगाडि बढाउने गरी २ अर्व ९५ करोड २० लाख बजेट निकासा हुन लागेको हो ।