आउँदो बजेटमा सामाजिक सुरक्षा भत्ता वृद्धि गरिन्छ : प्रधानमन्त्री ओली

काठमाडौँ । प्रधानमन्त्री केपी शर्मा ओलीले आउँदो बजेटमा सामाजिक सुरक्षा भत्ता वृद्धि गरिने बताएका छन् ।

नयाँ वर्षको अवसरमा राष्ट्रको नाममा सम्बोधन गर्दै प्रधानमन्त्री ओलीले सामाजिक सुरक्षा भत्ता महिनाको एक सयबाट सुरु गरेको स्मरण गर्दै उनले त्यो भत्ता दिनको एक सयमा पुगेको बताए ।  करिब ६० लाख सामाजिक सुरक्षामा आवद्ध भएको जानकारी पनि उनले बताए ।

नेपालमा हिंसाको राजनीति अवलम्बन गर्ने कुनै समूह नभएको प्रधानमन्त्री ओलीको दावी थियो । उनले सरकारले जनतामा आशा जगाउने कामहरु गरेको बताएका छन् । प्रधानमन्त्री ओलीले केही पनि भएको छैन भन्दै जनतालाई निराश बनाउने प्रयासहरु भए पनि सरकार त्यसबाट किञ्चित् विचलित नभएको बताए । प्रतिकुल समयमा पनि जनताले आशा लाग्दो कामहरु गरेको उनको भनाइ थियो । ‘जनतामा आशा जगाउने काम गरेका छौँ । सरकारका क्रियाकलापप्रति विश्वास दिलाउने काम गरेका छौँ,’ उनको भनाइ छ ।

प्रम ओलीले दिनमा साढे पाँच किलोमिटर बाटो बनाएको दाबी गर्दै एक दिनमा कम्तिमा १२ वटा दरले आवासहरू पनि निर्माण गरेका बताए ।  हिंसाको बाटो लिइरहेको समूहलाई शान्तिपूर्ण राजनीतिको मूलधारमा फर्काउन सरकार सफल भएको पनि उनको जिकिर थियो ।