आन्दोलनमा कि निर्वाचन : कांग्रेसमा देखियो दुई धार

काठमाडौं। सरकारले प्रतिनिधिसभा विघटन गरेपछि सडक आन्दोलन कि निर्वाचन भन्ने विषयमा नेपाली कांग्रेसमा मतभेद देखिएको छ । पार्टीको आधिकारिक धारणा तय गर्न नेपाली कांग्रेसको केन्द्रीय कार्य समिति बैठक यतिबेला जारी छ । कांग्रेसको बैठकमा सभापति शेरबहादुर देउवा र वरिष्ठ नेता रामचन्द्र पौडेलबीच दुई वटा धार देखिएको छ । 

प्रतिनिधिसभा विघटन गर्ने सरकारको कदम असंवैधानिक र अलोकतान्त्रिक भएको कांग्रेसको ठहर छ । नेपाली कांग्रेसमा देउवा पक्ष चुनावमा जानलाई कन्द्रित हुनुपर्ने बताइरहेका छन् भने । कांग्रेसले जारी बैठकबाटै आन्दोलनमा जाने कि निर्वाचनको तयारीमा जाने भन्ने टुङ्ग्याउने छ।

बैठकमा नेताहरू आन्दोलनमा जानु पर्ने र जान नहुने पक्षमा विभाजित देखिएका छन्। सभापति शेरबहादुर पक्षधर नेताहरू आन्दोलन नगरी चुनावमा जानुपर्ने पक्षमा र वरिष्ठ नेता रामचन्द्र पौडेल पक्षधर नेताहरू भने आन्दोलन गर्नुपर्न पक्षमा उभिएका छन्।

मंगलबार बैठकलाई सम्बोधन गर्दै सभापति देउवाले प्रतिनिधिसभा विघटन गर्ने सरकारको कदम असंवैधानिक र अलोकतान्त्रिक भएपनि निर्वाचनमा जाने कुरालाई सकारात्मक लिनुपर्ने आशय व्यक्त गरेका थिए।

तर, वरिष्ठ नेता पौडेलले भने सरकारको कदमविरुद्ध सशक्त संघर्ष गर्नुपर्नेमा जोड दिएका थिए। बैठकको पहिलो दिन हिजो सभापति देउवा र वरिष्ठ नेता पौडेलबाहेक नेताहरू महेश आचार्य र एनपी साउँदले धारणा राखेका थिए।