नक्कली भुटानी शरणार्थी प्रकरण: अदालतबाट कसुर कायम, सजाय तोक्न बाँकी

काठमाडौँ । नक्कली भुटानी शरणार्थी बनाएर नेपाली नागरिकलाई अमेरिका पठाउने भन्दै ठगी गरेको आरोपमा परेको मुद्दामा काठमाडौँ जिल्ला अदालतले प्रतिवादीहरूको कसुर कायम गरेको छ । अदालतको विस्तृत फैसलाको पूर्ण विवरण भने सार्वजनिक हुन बाँकी रहेको छ ।

उक्त प्रकरणमा नेपाली नागरिकलाई भुटानी शरणार्थीको परिचय दिलाएर विदेश पठाउने नाममा संगठित रूपमा रकम असुली गरेको आरोप लागेको थियो । घटनाको अनुसन्धानपछि जिल्ला सरकारी वकिल कार्यालय काठमाडौँले २०८० सालमा ३० जना प्रतिवादीविरुद्ध अभियोग पत्र दायर गरेको थियो ।

मुद्दामा पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँड, पूर्वगृहसचिव टेकनारायण पाण्डेसहित विभिन्न व्यक्तिहरू प्रतिवादीका रूपमा रहेका छन् ।

अदालतले कसुरसम्बन्धी निर्णय गरे पनि तत्काल सजाय निर्धारण भने नगर्ने भएको छ । तेजबहादुर खड्काको इजलासले सजाय निर्धारणका लागि छुट्टै प्रक्रिया अघि बढाउने आदेश दिएको हो । अब अदालतले कानुनी प्रक्रिया पूरा गरी प्रतिवादीहरूको सजाय निर्धारण गर्नेछ ।