काठमाडौं । सत्तारुढ दल नेकपाका सचिवालय बैठक सरेको छ । आजका लागि पार्टी कार्यालय पेरिसडाँडामा बोलाईएको बैठक दुई दिन पछि आइतबार सम्मलाई सारिएको छ । ’प्रधानमन्त्री ओलीको कार्यब्यस्तता देखाउदै बैठक सारिएको छ । संविधान दिवसका कार्यक्रममा प्रधानमन्त्री लाग्नु पर्ने भएको र तयारी नपुगेकोले बैठक दुई दिन पछि सार्ने सूचना आएको छ,‘– सचिवालयका एक सदस्यले सफलखबरसँग भने ।
अब बैठक ४ असोजमा ११ बजे नै पेरिसडाँडामै बस्नेछ । ३० महिनासम्म पार्टी केन्द्रको कुनै औपचारिक बैठक नबसेको र कोरोना कहरमा सामाजिक दुरी कायम गरेर बैठक स्थल बनाउनु पर्ने भएकोले सचिवालय बैठकको तयारी कोटेश्वरमा हिजो दिनभर गरिएको थियो । सिट ब्यवस्थापन गर्ने देखि सुरक्षाका लागि सुरक्षा ब्यवस्था बलियो बनाउने सम्मका काम हिजोबाटै शुरु गरिएको थियो ।
प्रधानमन्त्री समेत बैठकमा सहभागी हुने भएकोले बैठकको सुरक्षाका लागि बालुवाटारबाटै ओलीको सुरक्षामा खटिएका सुरक्षाकर्मीहरुले हिजै देखि पेरिसडाडाको कार्यालयमै अड्डा जमाएका थिए । पेरिसडाँडाको माथिल्लो तलमा रहेको हललाई बैठक कक्ष बनाउने गरी तयारी भएको थियो । अब बैठक दुई दिन सरेपछि सुरक्षाकर्मीको बाक्लो उपस्थितीलाई केही कम गरिएको छ ।
पेरिसडाँडा जालान् त प्रधानमन्त्री ओली ?
सत्तारुढ दल नेकपाका दुई तिर केन्द्रीय मुकाम छन्, एउटा धुम्बाराहीमा, अर्काे कोटेश्वर पेरिसडाँडामा । धुम्बाराहीको पार्टी केन्द्रीय कार्यालय भाडामा छ । कोटेश्वरको केन्द्रीय कार्यालय आफ्नै हो । तर भाडाको घरलाई केन्द्रीय कार्यालय र आफ्नै पार्टी भवनलाई जनवर्गीय संगठनको कार्यालयका रुपमा नेकपाले छुटटाएको छ । २०७५ जेठ ३ को तत्कालिन एमाले र माओवादी केन्द्रबीचको पार्टी एकता पूर्वसम्म धुम्बाराहीको कार्यलय एमाले र कोटेश्वर पेरिसडाँडाको कार्यालय माओवादी केन्द्रले प्रयोग गर्थे ।
एकतापछि दुवैतिर कार्यालय राख्ने गरी पार्टीका जोर पाइलट घोषणा गरिएका अध्यक्षद्दय केपी ओली र पुष्पकमल दाहाल प्रचण्डलाई दुवै तिर कार्यकक्ष बनाइए । पदभार ग्रहण गर्न दुबै तिरका कार्यालयमा नेताहरु एकै दिन पुगे पनि । त्यसपछि भने प्रधानमन्त्री समेत रहेका ओलीले पूर्व माओवादीको केन्द्रीय कार्यालय रहेको पेरिसडाँडाको कार्यालयमा पाइला समेत टेकेका छैनन् ।
धुम्बाराही स्थित कार्यालयमा आक्कलझुक्कल पुग्ने गरेपनि ओलीले पार्टीका अधिकाशं बैठकहरु सरकारी मुकाम बालुवाटारमै राखेर चलाउन थाले । जनस्तरमा पार्टी बैठकको अखडा बालुवाटारलाई बनाईएको भन्दै निक्कै आलोचना पनि भयो । तर पनि ओलीकै सहजताका लागि भन्दै घर झगडा गर्दा पनि बालुवाटार नै रोजियो, विवाद मिलाउदा पनि बालुवाटार नै रोजियो र बैठकहरु पनि बालुवाटारमै बस्दै आए ।
तर जब २६ भदौंलाई नेताहरुले पूराना विवाद अन्त्य गर्ने निश्चित दिनको रुपमा घोषणा गर्दै अध्यक्ष प्रचण्डले बैठकको अध्यक्षता, सञ्चालन, निर्णयको कार्यान्वयन र समग्र पार्टी काम गर्ने गरी कार्यकारी अध्यक्षको जिम्मा तोकियो र ओलीलाई सरकार सञ्चालनको जिम्मेवारी बाँडियो, त्यसपछि भने नेकपाको सचिवालय बैठक पहिलो पटक पार्टीको जनवर्गीय संगठनको कार्यालयका रुपमा रहेको कोटेश्वर पेरिसडाँडामा बस्न खोज्दैछ ।
आज बोलाईएकौ बैठक ४ असोज सम्मलाई सारेपनि पेरिसडाँडामै बस्ने भनिएको छ । एमाले माओवादी बीचको एकतापछि पेरिसडाँडामा पार्टी केन्द्रको पहिलो बैठक बस्न लागेको हो । यसका लागि पेरिसडाँडाका केन्द्रीय कार्यालयको माथिल्लो तलाको हलमा बैठक राख्ने तयारी भएको छ । अब प्रश्न उठेको छ, कहिल्यै कोटेश्वर पेरिसडाँडामा जान नरुचाउने ओली आज पार्टी बैठकका लागि बालुवाटार र धुम्बाराही छोडेर पेरिसडाँडा जालान् ? नेकपाभित्रै प्रश्न उठ्ेको छ ।
नेकपाका पूर्व माओवादी धारका एक स्थायी समिति सदस्य भन्छन्, –’प्रधानमन्त्री ओली पेरिसडाँडा जान्छन् की जादैनन, उहाँको परिक्षा हुदैंछ ।‘
तर प्रधानमन्त्रीका एक सल्लाहकारले ओली पेरिसडाँडाको पार्टी बैठकमा जाने बताएका छन् । ’दुई अध्यक्षबीचको छलफलकै आधारमा पार्टी बैठकको मिति र स्थान तोकिएको हो, त्यसकारण उहाँ (प्रधानमन्त्री) नजाने भन्ने नै हुदैन, जानुहुन्छ,‘– प्रधानमन्त्री ओलीका एक सल्लाहकारले भने ।
धुम्बाराहीको पार्टी कार्यालय मर्मत सम्हारकै क्रममा रहेको र धुम्बाराही कार्यालयको तल्लो तलामा बैठक राख्ने हल गुम्म परेर गुम्सिने खालको रहेकोले बैठक पेरिसडाँडामा राख्न लागिएकोले उहाँ नजाने भन्ने नभएको ति सल्लाहकारको भनाई छ । शुक्रबारको बैठक एकाएक दुई दिन पछि सारिएका कारण अझैं पनि ओलीको पेरिसडाँडा बैठकमा जाने नजाने विषयमा भन्न नसकिने नेताहरु नै बताउँछन् ।
प्रतिक्रिया दिनुहोस
सफल खबर संवाददाता
शुक्रबार, ०२ असोज २०७७, ०८ : ४१
लेखकबाट थप
सम्बन्धित समाचारहरु
एकीकृत समाजवादीले बोलायो सचिवालय बैठक
एमालेले बोलायो सचिवालय बैठक
नेकपा एसको सचिवालय बैठक सुरु
एमालेले बोलायो सचिवालय बैठक
जनमत पार्टीको सचिवालय बैठक जारी
एकीकृत समाजादीको सचिवालय बैठक सुरु