पोखरामा पहिरोले ४ जनाको मृत्यु, ९ जना घाईते

पोखरा । अविरल परेको वर्षाका कारण गएको पहिरोमा परी पोखराका विभिन्न स्थानमा चार जनाको मृत्यु भएको छ । ९ जना घाइते भएका छन् ।

पोखरा महानगरपालिका–१८ सराङकोट गोठादीस्थित टंकबहादुर थापाको घरमाथिबाट राति ३ बजेतिर खसेको पहिरोमा पुरिँदा तीन जनाको मृत्यु भएको छ । पहिरोमा परि घाईते अन्य छ जनालाई उद्धार गरी मणिपाल शिक्षण अस्पताल र पश्चिमाञ्चल अस्पतालमा लगिएको जिल्ला प्रहरी कार्यालय पोखराले जनाएको छ । 

त्यसैगरी पोखरा महानगरपालिका–२५ हेमजामा रामचन्द्र अधिकारीको घर पहिरोमा पुरिँदा उनकी  ७० वर्षीया आमा भीमकली अधिकारीको घटनास्थलमै मृत्यु भएको छ । अविरल वर्षासँगै पोखराको रामघाटस्थित सेती नदी थुनिँदा सुकुम्वासी बस्ती डुबानमा परेको छ ।