काठमाडौं । नेपालमा कोरोना संक्रमतिको अवस्था कस्तो होला ? पछिल्ला दिनमा कोरोना संक्रमितको संख्या एकै दिनमा झण्डै १ सय जनासम्ममा देखिन थालेपछि अहिले यस विषयमा मान्छेहरुले विभिन्न अड्कलबाजी लगाउन थालेका छन् । कोरोना भाइरस (कोभिड १९) संक्रमणको संख्या गत चैतको पहिलो सातामा जम्माजम्मी दुई जनामा मात्र देखिएकोमा अहिले यो संख्या बढेर ७ सय हाराहारीमा छ ।
हिजो मात्रै ९६ जनामा कोरोना संक्रमण पुष्टि भएको स्वास्थ्य मन्त्रालयले जनाएको थियो । पछिल्ला दिनमा बढ्न थालेको संक्रमितको संख्या हेर्दा सरकारले अनुमान गरेभन्दा अवस्था कतै भयावह हुने चरणमा त नेपालमा छैन ? मान्छेहरुले अनेक आशंका गरिरहेका छन् । परिक्षण नै कम भएको र परिक्षण भएका थोरैबाट ७ सयको हाराहारीमा कोरोना संक्रमतिको संख्या देखिनु आफैमा चुनौतिपूर्ण अवस्था रहेको जानकारहरु बताउँछन् ।
नेपालमा यसले कस्तो रुप लेला ? कति प्रभावित होलान् भन्ने पूर्व अनुमानमा जुटेका कतिपयले नेपालमा डरलाग्दो जोखिमको सम्भावना औंल्याईरहेका छन् । तर सरकारले अहिले झण्डै ५ हजार ब्यक्ती संक्रमित हुन सक्ने प्रक्षेपण गरेको छ । स्वास्थ्य मन्त्रालय स्रोतका अनुसार, ५ हजार जति मानिसमा नेपालमा कोभिड १९ को संक्रमण देखिन सक्छ । यस अगाडी सरकारले जम्माजम्मी १ हजार ५ सय हाराहारीमा संक्रमित देखिन सक्ने अनुमान लगाएको थियो । तर पछिल्लो साता यता ह्वातै बढन थालेको संक्रमितको संख्यालाई हेरेर सरकारले नयाँ प्रक्षेपण गरेको स्वास्थ्य मन्त्रालयका अधिकारीहरुले बताएका छन् ।
अहिले नेपालमा कोभिड परिक्षणका लागि सरकारले पिसिआर र आरडिटी गरी दुई वटा प्रविधि प्रयोग गरिरहेको छ । आरडिटी भरपर्दो नभएको र स्याम्पलिङका लागि मात्र रहेको बताईरहेका बेला पिसिआर परिक्षणलाई मात्र आधिकारिक मान्न सकिने अवस्था छ । यसबाट अहिलेसम्म झण्डै ५० हजारमा परिक्षण गरिएको छ । ५० हजार जनामा परिक्षण गर्दा ७ सय हाराहारी संक्रमति भएको पुष्टि भएको छ । यो भनेको ७५ जनालाई परिक्षण गर्दा १ जनामा कोरोना संक्रमण भेटिएको तथ्यांक हो । यस अर्थमा नेपालमा परिक्षण गरिएकामध्ये ७५ जनामध्ये १ जनामा संक्रमण पुष्टि भएको अर्थमा लिन सकिन्छ । पछिल्लो साता बढेको संक्रमणले नेपालमो संक्रमतिको संख्या ५ हजार पुग्न सक्ने अनुमान लगाउँदै सरकारले सोही अनुसारको तयारी थालेको छ ।
पछिल्लो पटक सरकारले कुल जनसंख्याको २ प्रतिशतमा कोरोना परिक्षण गराउने लक्ष्य बनाएको छ । प्रधानमन्त्री केपी ओलीले हिजो मात्रै देशवासीका नाममा गरेको सम्बोधनमा उनले २ प्रतिशत जनसंख्याको कोरोना परिक्षण गरिने बताएका थिए । यस हिसाबले झण्डै ६ लाख मानिसको कोरोना परिक्षण गर्ने योजना सरकारले सार्वजनिक गरेको छ । विज्ञहरुले दिएको सल्लाहबमोजिम कम्तिमा जनसंख्याको २ प्रतिशतसम्म परीक्षण बिस्तार गर्ने योजनामा सरकार रहेको प्रधानमन्त्री ओलीको सोमबार देशवासीका नाममा गरिएको सम्बोधनमा उल्लेख थियो ।
केन्द्रीय तथ्यांक विभागका अनुसार अहिले नेपालको जनसंख्या कुल २ करोड ९९ लाख ६६ हजार २ सय ४० छ । यसको दुई प्रतिशत को परीक्षण गर्दा कम्तीमा ६ लाख मानिसहरुको परिक्षण गर्नुपर्ने हुन्छ । सरकारले यसरी ६ लाख मान्छेको परिक्षण गर्ने योजना बनाएको छ । अहिले तत्कालका लागि सरकारले ५ हजार संक्रमति हुन सक्ने अनुमानमा सोही अनुसारको तयारी थालेको छ । परिक्षणका क्रममा २ हजार ब्यक्ती पुगे त्यसपछिको अवस्थालाई मध्यनजर गरेर नयाँ रणनीति बनाईने तयारीमा सरकार रहेको स्वास्थ्य सेवा विभाग ब्यवस्थापन महाशाखाका निर्देशक भोगेन्द्रराज डोटेल बताउँछन् ।
उनका अनुसार, अहिले सोही अनुसार स्वास्थ्य सामग्री खरिद प्रक्रियामा सरकार जुटिसकेको छ । सरकारसँग अहिले कोरोना परिक्षणका लागि आवश्यक भिटिएम किट र पिसिआर किटको लागि टेन्डर आह्रवान भईसकेको छ । भिटिएम २ लाख ५० हजार र पिसिआर १ लाख किट खरिदको तयारीमा सरकार छ । पिसिआर अहिले सरकारसँग जम्माजम्मी मौज्दात ५० हजार किट छ । हिजो मात्रै बसेको मन्त्रिपरिषद् बैठकले भारत लगायत तेश्रो मुलुकमा रहेका २५ हजार नेपाली नागरिकलाई पहिलो चरणमा प्राथमिक सूचिका आधारमा स्वदेश फर्काउने र उनीहरुको पिसिआर परिक्षण गरेर मात्र घर जान दिने गरि निर्देशिका पारित गरेको छ ।
अब सो अनुसार सरकारले विदेशमा रहेका नेपालीलाई स्वदेश फर्काउन खोजेको छ । सरकारले दक्षिण छिमेकी मुलुक भारतबाट भने अनुमान गरिएभन्दा बढी नेपालीहरु स्वदेश फिर्ता भएको जनाएको छ । यसले पनि सरकारलाई थप दबाबमा राखेको स्वास्थ्य मन्त्रालयका अधिकारीहरुको भनाई छ । यसले गर्दा पनि नेपालमा कोरोना संक्रमणले कुन स्तरसम्मको असर गर्छ ? अहिले नै अनुमान लगाई हाल्ने अवस्था भने देखिएको छैन ।
प्रतिक्रिया दिनुहोस
सफल खबर संवाददाता
मंगलबार, १३ जेठ २०७७, ०८ : ४६
लेखकबाट थप
सम्बन्धित समाचारहरु
एक हप्तामा २८ जनामा कोरोना सङ्क्रमण
सुदूरपश्चिममा सात जनामा कोरोना पुष्टि
थप दुई जनामा कोरोनाको नयाँ भेरिएन्ट जेएन वान् सङ्क्रमण
नेपालमा भेटियो कोरोनाको नयाँ भेरियन्ट
विश्वभर बढे कोरोना संक्रमित, सतर्कता अपनाउन आग्रह
चीनमा पुनः कोरोना : अक्टोबरमा २४ जनाको मृत्यु