भारतमा फैलँदो कोरानाः २७ राज्यमा नयाँ भेरियन्ट, ४४ को मृत्यु

काठमाडौँ । भारतमा कोरोना भाइरसका नयाँ सङ्क्रमितको सङ्ख्या दिनप्रतिदिन बढ्दै गएको छ । पछिल्लो रिपोर्टअनुसार मङ्गलबार मात्र ३ सय नयाँ कोरोना सङ्क्रमणका केसहरू पुष्टि भएका छन् । तीमध्ये सबैभन्दा धेरै गुजरातमा १०८ र महाराष्ट्रमा ८६ केस भेटिएका छन् । यससँगै भारतभर सक्रिय सङ्क्रमितको सङ्ख्या ४ हजार ३ सय २ पुगेको छ ।

हालसम्म भारतका २७ वटा राज्य तथा केन्द्र शासित प्रदेशमा कोरोना फैलिसकेको छ। यद्यपि ९ वटा राज्यहरूमा हालसम्म कुनै पनि सङ्क्रमित नभेटिएका त्यहाँका सञ्चारमाध्यमलाई उद्धृत गर्दै भास्करले लेखेको छ ।

सबैभन्दा बढी १ हजार ३ सय ७३ सक्रिय केस केरला राज्यमा भेटिएका छन्, जुन सबैभन्दा प्रभावित राज्य बनेको छ । त्यसपछि ५ सय १० सक्रिय केससहित महाराष्ट्र दोस्रो स्थानमा रहेको छ ।

जनवरीदेखि देखा परेको कोरोना भाइरसका नयाँ भेरियन्टहरूले हालसम्म देशभर ४४ जनाको ज्यान लिइसकेको छ । तीमध्ये ३७ जनाको मृत्यु पछिल्ला ५ दिनमा मात्र भएको हो ।मङ्गलबार मात्रै महाराष्ट्रमा ४ जनाको मृत्यु भएको पुष्टि गरिएको थियो । जससँगै यस राज्यमा मृत्यु सङ्ख्या १४ पुगेको छ। दिल्ली, गुजरात र तमिलनाडुमा पनि एक–एक जनाको मृत्यु भइसकेको छ ।

हिमाचल प्रदेशमा मङ्गलबार पहिलोपटक कोरोना सङ्क्रमण पुष्टि भएपछि राज्य सरकारले सबै अस्पतालहरूमा मास्क अनिवार्य गरेको छ । उता केरला सरकारले नयाँ गाइडलाइनअन्तर्गत रहेर सबै सरकारी तथा निजी अस्पतालमा मोक ड्रिल (पूर्व अभ्यास) गर्न आदेश दिएको छ ।