काठमाडौं । नेकपाका २० जना स्थायी समिति सदस्यहरु आगामी रणनीतिबारे छलफल गर्न पार्टी कार्यालय धुम्बाराहीमा भेला भएका छन् । 

स्थायी समितिको बैठक अनिश्चित भएपछि नेकपाको मुख्यालय धुम्बाराहीमा बिहीबार भेला भएका उनीहरुले विधान विपरित बैठक नबोलाएर नेतृत्वले गम्भीर गल्ती गरेको निष्कर्ष निकालेका छन् ।

त्यस्तै उनीहरुबीच नेतृत्वले बैठक नबोलाए आफै बोलाउने विषयमा समेत छलफल भएको सहभागी एक सदस्यले बताए । 

भेलामा गत बैशाख १० गते बैठकको माग गर्दै हस्ताक्षरसहित पत्र बुझाउने सदस्यहरु सहभागी भएका थिए । 
 बैठकका लागि अझै दवाव दिने निष्कर्ष निकालेको स्थायी समिति सदस्य देव गुरुङले जानकारी दिए । 

बिहीबारबाट सुरु हुने भनिएको स्थायी समिति बैठक बुधबारको सचिवालय बैठकमा प्रधानमन्त्री तथा पार्टी अध्यक्ष केपी शर्मा ओलीले अचानक बैठकको औचित्य नभएको भन्दै अरुचि देखाएपछि स्थगित भएको थियो ।