कोरोना रोकथामका लागि नेपालले लियो विश्व बैंकबाट २ करोड ९० लाख डलर सहुलियत ऋण

काठमाडौं । विश्वव्यापी रुपमा कोरोनाको महामारी फैलिएसंगै त्यसलाई रोक्न भन्दै नेपाललाइ विश्व बैंकले २ करोड ९० लाख डलर (करिब ३ अर्ब ४८ करोड रूपैयाँ) सहुलियत ऋण सहयोग गर्ने भएको छ ।

मंगलबार अर्थ मन्त्रालयमा यो सहायता प्रदान गर्ने सम्बन्धमा दुईपक्षीय सम्झौता गरिएको हो । सम्झौतामा अर्थसचिव शिशिर ढुंगाना र नेपालका लागि विश्व बैंकका कन्ट्री म्यानेजर फारिस हदाद जेर्बोसले हस्ताक्षर गरेका हुन् ।

कोरोना भाइरस आपतकालीन पूर्वतयारी योजनाअन्तर्गत यो रकम उपलब्ध गराउने विश्व बैंकले जनाएको छ । यस परियोजनाअन्तर्गत प्राप्त रकम कोरोना भाइरसविरुद्ध नेपालको क्षमता अभिवृद्धिमा खर्च गरिने जनाइएको छ ।

अर्थसचिव ढुंगानाले देशभर आकस्मिक स्वास्थ्य क्षमता र पूर्वाधार बढाउनसमेत यो रकम प्रयोग गरिने बताएका छन् । विश्व बैंकले आफ्ना सदस्य राष्ट्रहरूमा १ खर्ब ६० अर्ब डलर सहायता प्रदान गर्ने जनाएको छ ।

दक्षिण एसियाली राष्ट्रहरूमा तत्कालका लागि नेपाललाई न्यून रकम उपलब्ध गराएको विश्व बैंकले भारतलाई १ अर्ब डलर सहायता प्रदान गरेको छ । कोरोनाको महामारीसंग लड्न र रोकथाममा यो रकम खर्चिने बताइएको छ ।