‘प्रधानमन्त्रीको अभिव्यक्तिसम्बन्धी विषयमा परराष्ट्र मन्त्रालयकै धारणा आधिकारिक’ : रवि लामिछाने

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले प्रधानमन्त्री वालेन्द्र शाह (बालेन)को पछिल्लो अभिव्यक्तिलाई लिएर उत्पन्न बहसका सम्बन्धमा परराष्ट्र मन्त्रालयले सार्वजनिक गरेको स्पष्टिकरणलाई नै सरकारको आधिकारिक धारणा मान्नुपर्ने बताएका छन्।

शुक्रबार सञ्चारकर्मीसँग कुरा गर्दै उनले अन्तर्राष्ट्रिय सम्बन्ध र परराष्ट्र नीतिसँग जोडिएका विषय कुनै एक राजनीतिक दलको मात्र सरोकार नभई समग्र राष्ट्रसँग सम्बन्धित हुने बताए। उनका अनुसार यस्ता विषयमा सरकारको औपचारिक धारणा सम्बन्धित निकायमार्फत सार्वजनिक हुने भएकाले त्यसलाई नै आधार मान्नुपर्छ।

प्रधानमन्त्रीको अभिव्यक्तिपछि विभिन्न कोणबाट टिप्पणी भइरहेका बेला सरकारले आफ्नो आधिकारिक दृष्टिकोण परराष्ट्र मन्त्रालयमार्फत स्पष्ट गरिसकेको उनले उल्लेख गरे। त्यसैले उक्त विषयमा थप व्यक्तिगत टिप्पणी आवश्यक नदेखिएको उनको भनाइ थियो।

लामिछानेले परराष्ट्र मन्त्रालयले घटनाको सन्दर्भ, आशय र सरकारको बुझाइबारे आधिकारिक जानकारी सार्वजनिक गरिसकेकाले त्यसपछिको बहसलाई अनावश्यक रूपमा विस्तार गर्नुपर्ने अवस्था नरहेको बताए।

उनले अन्तर्राष्ट्रिय सम्बन्धसँग जोडिएका संवेदनशील विषयमा राज्यका संस्थागत धारणा र औपचारिक सञ्चारलाई प्राथमिकता दिनुपर्नेमा जोड दिए।