कोरोनाको असर : रोकियो कालीगण्डकी करिडोर आयोजना निर्माण

गैँडाकोट । विश्वव्यापी रुपमा फैलिएको कोरोनाको असरले राष्ट्रिय गौरवको कालीगण्डकी करिडोर आयोजना निर्माण रोकिएको छ । कोरोनाको असरका कारण कच्चा पदार्थ आउन नसकेपछि कालीगण्डकी करिडोरको आयोजना रोकिएको हो ।  

गैंडाकोट–रामपुर–पीपलडाँडा खण्डको १३१ किलोमिटर खण्डमा ढुंगागिटी र बालुवा नहुँदा गत सातादेखि निर्माण रोकिएको हो । आयोजना निर्माण गत पुसबाट थालिएको थियो । 

कच्चा पदार्थ नहुँदा ठेकेदार कम्पनीले नाला बनाउने र कल्भर्ट बनाउने काम बन्द गरेको छ । गैंडाकोट खण्डदेखि उत्तरपश्चिममा निर्माणाधीन सडकको पहिलो ३२ किलोमिटर खण्डमा कच्चा पदार्थको अभाव भएका कारणले निर्माण रोकिएको हो । 

महेन्द्र राजमार्गको गैंडाकोटबाट ७४ किलोमिटर खण्ड पूर्वी नववलपरासीमा पर्दछ। गैंडाकोट, कोटथर , बुलिङटार, डेडगाउँ हुँदै पाल्पाको रामपुर र पीपलडाँडा सडक निर्माण जिम्मेवारी भारतीय ठेकेदार कम्पनी इकेके इन्फ्रास्ट्रक्चर लिमिटेडले लिएको छ। 

भारतीय कम्पनीका नेपाली प्रतिनिधि इन्जिनियर रोहित भट्टराईले ३ वर्षभित्र सडक निर्माण सकेर नेपाल सरकारलाई हस्तान्तरण गर्नुपर्ने आयोजनामा कच्चा पदार्थ अभावले काम अघि बढ्न नसकेको जानकारी दिए।

सम्झौताअनुसार आउँदो माघ १५ गतेभित्र निर्माण सकाउनुपर्ने छ। करिब पौने ५ अर्बको लागतमा गैंडाकोटदेखि पीपलडाँडासम्म निर्माण ठेक्का दिइएको छ।