‘महाधिवेशनमार्फत नेतृत्व हस्तान्तरण र पुनर्गठन गर्छौँ’ : ‘प्रचण्ड’

काठमाडौँ। नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले आगामी महाधिवेशनपछि पार्टी नेतृत्व संरचनामा नयाँ पुस्तालाई प्राथमिकताका साथ अघि बढाइने बताएका छन्। उनका अनुसार संगठनको सबै तहमा युवा नेतृत्वलाई अवसर दिने तयारी भइरहेको छ।

पार्टी स्थापना दिवसका अवसरमा पेरिसडाँडामा आयोजित कार्यक्रमलाई सम्बोधन गर्दै उनले आगामी छ महिनाभित्र महाधिवेशन सम्पन्न गर्ने लक्ष्यसहित आन्तरिक तयारी अघि बढाइएको जानकारी दिए। सोही महाधिवेशनपछि पार्टी पुनर्गठनको प्रक्रियामा जाने उनको भनाइ थियो।

प्रचण्डले पार्टी नेतृत्वमा पुस्तान्तरण आवश्यक रहेको उल्लेख गर्दै वर्तमान नेतृत्वले पनि नयाँ भूमिकामा रूपान्तरण हुने गरी छलफल भइरहेको बताए। उनले संगठनलाई थप गतिशील बनाउन युवा पुस्ताको सक्रिय सहभागिता अपरिहार्य भएको धारणा राखे।

उनका अनुसार वाम तथा कम्युनिस्ट आन्दोलनलाई पुनर्गठन नगरी अघि बढ्न कठिन हुने अवस्था देखिएको छ। पार्टीमा पूर्वप्रधानमन्त्री, उपप्रधानमन्त्री तथा विभिन्न मन्त्रीहरूको अनुभव रहेको उल्लेख गर्दै उनले हाल सरकारको जिम्मेवारीमा नरहेको अवस्थामा संगठनलाई सुधार गर्ने अवसर प्राप्त भएको टिप्पणी गरे।

उनले महाधिवेशनलाई नेतृत्व हस्तान्तरण र संगठनात्मक पुनर्संरचनाको महत्वपूर्ण अवसरका रूपमा उपयोग गर्ने तयारी भइरहेको स्पष्ट पारे।