सिंहदरबार प्रदर्शनका क्रममा पक्राउ परेका नेविसंघ नेताहरू रिहा गर्न काँग्रेसको माग

काठमाडौँ। नेपाली काँग्रेसले नेपाल विद्यार्थी संघ (नेविसंघ) का नेताहरूलाई पक्राउ गरिएको घटनाप्रति आपत्ति जनाउँदै उनीहरूको तत्काल रिहाइको माग गरेको छ।

गृहमन्त्री सुधन गुरुङको राजीनामा माग गर्दै सिंहदरबार परिसरमा प्रदर्शनमा उत्रिएका नेविसंघका नेताहरूलाई प्रहरीले नियन्त्रणमा लिएपछि काँग्रेसले औपचारिक प्रतिक्रिया सार्वजनिक गरेको हो।

काँग्रेसका प्रवक्ता देवराज चालिसेका अनुसार पक्राउ पर्नेमा नेविसंघ केन्द्रीय सदस्य इञ्जिनियर भुवन भट्टसहित कुम्भराज देउवा, नवीन विष्ट, आकाश देवकोटा, सुशील ऐडी र विशाल विसीलगायतका विद्यार्थी नेताहरू रहेका छन्।

पार्टीद्वारा जारी विज्ञप्तिमा लोकतान्त्रिक व्यवस्थामा अभिव्यक्ति स्वतन्त्रता, शान्तिपूर्ण आवागमन तथा असहमति प्रकट गर्ने अधिकार नागरिकका मौलिक हक भएको उल्लेख गरिएको छ। यस्ता अधिकारको संरक्षण राज्यको संवैधानिक दायित्व भए पनि प्रदर्शनका क्रममा पक्राउ गर्ने कार्यले लोकतान्त्रिक मूल्य र विधिको शासनमाथि प्रश्न उठ्ने अवस्था सिर्जना गरेको काँग्रेसको भनाइ छ।

काँग्रेसले असहमति व्यक्त गर्ने अभ्यासलाई नियन्त्रण गर्ने प्रवृत्ति संविधानको मर्म र लोकतान्त्रिक संस्कृति विपरीत रहेको निष्कर्ष निकालेको छ।

त्यसैगरी विज्ञप्तिमा असहमति लोकतन्त्रको अनिवार्य अंग भएको उल्लेख गर्दै त्यसलाई दमन होइन, संवाद र सहकार्यमार्फत सम्बोधन गर्नुपर्ने धारणा राखिएको छ। काँग्रेसले सम्बन्धित निकायसँग पक्राउ परेका विद्यार्थी नेताहरूलाई बिना शर्त तत्काल रिहा गर्न र भविष्यमा मौलिक अधिकारमाथि कुनै पनि प्रकारको हस्तक्षेप नगर्न आग्रह गरेको छ।