चीनले भन्यो–कोरोनाको उत्कर्ष सकियो

काठमाडौं ।  चीनले कोरोना भाइरस कोभिड–१९ को उत्कर्ष सकिएको बताएको छ । हुबेई प्रान्तमा नयाँ संक्रमितको संख्या एक अंकमा झरेसँगै चिनियाँ शीर्ष स्वास्थ्य अधिकारीले कोरोनाको उत्कर्ष सकिएको बताएका हुन् ।

बुधबार हुबेई प्रान्तमा केवल ८ जनामा कोरोना भाइरसको नयाँ संक्रमण देखिएको थियो । भाइरस फैलिएपछि पहिलोपटक नयाँ संक्रमितको संख्या १० भन्दा पनि कम देखिएको हो ।

चीनको राष्ट्रिय स्वास्थ्य आयोगका प्रवक्ता मि फेङले सञ्चारकर्मीहरुसँग कुरा गर्दै चीनको लागि भाइरसको उत्कर्ष सकिएको बताएका हुन् ।

डिसेम्बरबाट देखिएको कोरोना भाइरसका कारण चीनमा मात्र ३ हजार १६९ जनाको मृत्यु भएको छ भने समग्र संक्रमित ८० हजार ७९६ पुगेको छ, जसमध्ये ६२ हजार ८१५ जना मानिस निको भएका छन् ।