किन भेट्न चाहेनन् क्यानडाका सभामुख फयुरीले नेपालका सभामुख सापकोटालाई

काठमाडौँ  । क्यानडाको माथिल्लो सदन (सिनेट)का सभामुख जर्ज जे फ्यूरीले नेपालको प्रतिनिधिसभाका सभामुख अग्निप्रसाद साकोटालाई भेटेनन् । उनले राष्ट्रिय सभाका अध्यक्षसँग भेटघाट गरी राष्ट्रिय सभा बैठकको समेत स्थलगत अवलोकन गरेपनि सभामुख सापकोटालाई भेटन चाहेनन् । उनले नै अस्विकार गरेको बुझिएको छ । खासगरी द्धन्द्ध व्यवस्थापनका देखिएको असन्तुष्टिका कारण भेट्न नचाहेको बताइन्छ । 

तर उनले नेपाल क्याडना साँसद मैत्री समुहका सदस्हरुसँग भने खुलेर कुराकानी गरेका छन् । जसमा प्रतिनिधिसभा र राष्ट्रिय सभाका साँसदहरु समेत सहभागि थिए । सो क्रममा उनले नेपालले चैतमा गर्न लागेको ‘सगरमाथा सम्बाद’मा क्यानडाले सक्रिय सहभागिता जनाउने प्रतिबद्धता जनाए ।  नेपाल र क्यानडाले जलवायु परिवर्तनको उस्तै असर झेल्दै आएको उल्लेख गर्दै उक्त सम्बाद फलदायी हुने विश्वास व्यक्त गरे । आगामी चैतमा हुनलागेको सगरमाथा सम्बाद जलवायु परिवर्तनको असरमा केन्द्रीत हुनेछ ।

क्यानेडेली सिनेट सभामुख फ्युरीले नेपाल भ्रमण वर्ष २०२० को सफलताको शुभकामना दिँदै आफ्ना नागरिकलाई नेपाल भ्रमणका लागि सकारात्मक सन्देश प्रवाह गर्ने बचन दिए । नेपाल र क्यानडा बीच लामो समयदेखि दौत्यसम्बन्ध स्थापना भएको स्मरण गर्दै अबका दिनमा  नेपालको पर्यटन, व्यापार र लगानीको क्षेत्रमा सहयोग गर्ने प्रतिबद्धता जनाए , क्यानडाको विकास निर्माण र सफलताको विषयमा आफ्ना केही अनुभवलाई नेपालसँग साट्न पाएकोमा खुसी व्यक्त गरे । सभामुख फ्यूरीले नेपालको छिमेकी देश चीनमा कोरोना भाइरसको भयावह स्थिति रहेपनि आफुहरुको भ्रमणले नेपाल सुरक्षित छ भन्ने सन्देश विश्वमाझ पुग्ने आशा व्यक्त गरे ।

नेपाल कम्युनिष्ट पार्टी (नेकपा) का सांसद खगराज अधिकारीले उपयुक्त समयमा नेपाली प्रतिनिधिमण्डलको क्यानडा भ्रमण हुने विश्वास दिलाउँदै उक्त प्रतिनिधिमण्डलसँग अन्तरक्रिया गर्न पाएकोमा खुसी व्यक्त गरे । नेपाली काँग्रेसको प्रतिनिधिसभा सदस्य पार्वता डिसी चौधरीले महिला बालबालिका लगायत क्षेत्रमा क्यानडाले गरेको सहयोगको उच्च प्रशंसा गर्दै पर्यटन, व्यापार र लगानीको क्षेत्रमा थप सहयोग गर्ने सभामुख फ्यूरीको प्रतिबद्धताको स्वागत गरिन् ।

नेकपाकी प्रतिनिधिसभा सदस्य सरिता न्यौपानेले नेपाल भ्रमणमा आउनुभएका क्यानडेली प्रतिनिधिमण्डललाई स्वागत गर्दै नेपाल भ्रमण वर्ष सफल पार्न क्यानडाकोतर्फबाट सहयोग रहने विश्वास व्यक्त गरिन् ।  आजै राष्ट्रिय सभा बैठकमा बोल्दै साँसदहरु दीनानाथ शर्मा र सुरेन्द्रराज पाण्डे लगायतले नेपाल र क्यनडाको राजनीतिक प्रणाली धेरै मिल्दो जुल्दो रहेको प्रतिक्रिया दिएका थिए । नेपाल संघीय गणतन्त्रात्मक राज्य हो भने क्यानडा संवैधानिक राजतन्त्रात्मक राज्य हो । तर अन्य विषयहरु धेरै मिल्ने साँसदहरुले बताएका छन् ।