दुबई दुर्घटना: तीन नेपाली महिलाको मृत्यु, १४ घाइते भएको पुष्टी

काठमाडौं । दुबइमा भएको सडक दुर्घटनामा पनि तीन नेपाली महिलाको मृत्यु भएको र १४ जना घाइते भएको त्यहाँस्थित नेपाली राजदुतावासले जनाएको छ । 

मोर्डन विल्डिंग मेन्टेनेन्स कम्पनीअन्तर्गत कार्यरत २४ जना कामदार चढेको मिनीबस संयुक्त अरब ईमिरेटस्को अबुधाबीस्थित अल राहा रोडमा विहिबार दुर्घटना भएको थियो । 

उक्त मिनीवसमा चालकसहित सवार २५ जनामध्ये १७ जना नेपाली महिला कामदार रहेको र त्यसमध्ये ३ जनाको घटनास्थल मै मृत्यु भएको दुतावासले पुष्टी गरेको छ । 

मृत्यु हुनेहरूमा झापा घर भएकी कृष्णकुमारी अधिकारी (राहदानी न ५७२३९४), प्यूठानकी भावना कुँवर (राहदानी नं ७२०११९) र बारा घर भएकी अमिसा मोक्तान तामाङ्ग (राहदानी नं ९६७८४७५) रहेको दुबईस्थित नेपाली राजदुतावासले जानकारी दिएको छ । 

उक्त दुर्घटनामा परी घाइते भएका १४ जना नेपाली महिला कामदारहरूको स्थानीय विभिन्न अस्पतालमा उपचार भइरहेको जनाइएको छ । 

घटनालगत्तै राजदूत कृष्णप्रसाद ढकाललगायत राजदूतावासका अन्य अधिकारीले उक्त तीनवटा अस्पतालमा उपचार गराइरहेका घाइतेहरूलाई भेट गरी अस्पताल प्रशासन एवं उपचारमा संलग्न डाक्टरहरूसँग उनीहरूको अवस्थाको बारेमा जानकारी लिएका थिए । 

आवश्यक प्रक्रिया पुरा गरी मृतकको शव नेपाल लैजानेलगायत अन्य समन्वय एवं सहजीकरणका लागि स्थानीय प्रशासन, कम्पनी र अस्पतालसँग समन्वय भइरहेको जनाइएको छ ।