पैसा नतिरी अर्बौंको शेयर कारोबार: दीपक भट्टको 'उधारो' मोहले बजारमा हलचल

काठमाडौं । व्यवसायी दीपक भट्टले धितोपत्र खरिद–बिक्री गर्दा ब्रोकरलाई कुनै पनि नगद भुक्तानी नगरी अर्बौंका शेयर कारोबार गर्ने गरेको खुलासा भएको छ ।

धितोपत्र बोर्डको प्रतिवेदन अनुसार भट्टले भृकुटी स्टक ब्रोकिङमार्फत शेयर खरिद गर्दा न त ब्रोकरलाई रकम बुझाए, न त शेयर बिक्री गर्दा ब्रोकरबाट रकम नै लिए ।

यसरी पैसाको लेनदेन नै नगरी 'उधारो' मा शेयरको खेलोफड्को गरेर उनले बजारमा कृत्रिम रूपमा मूल्य बढाउने गरेको पाइएको छ ।

ब्रोकरसँगको सेटिङमा भएको यो 'क्यासलेस' कारोबार धितोपत्र सम्बन्धी ऐन, २०६३ को दफा ९६ विपरीतको गम्भीर कसूर भएको प्रतिवेदनमा उल्लेख छ ।

बिना लगानी अर्बौंको शेयर खेलाएर बजार प्रभावित पारेको भन्दै उनीमाथि कारबाहीको सिफारिस गरिएको छ ।