हेलिकप्टरबाट टोली लगेर किमाथाङकामा स्थापना भयो सीमा सुरक्षा पोष्ट

काठमाडौँ । संखुवासभा जिल्लाको भोटखोला गाउँपालिका १ स्थित किमाथाङकामा सशस्त्र प्रहरी बल नेपालको बोर्डर आउट पोष्ट (बिओपी) स्थापना भएको छ । हेलिकप्टरबाट टोली लगेर ससस्त्र प्रहरीले विओपी स्थापना गरेको हो । 

सशस्त्र प्रहरी बल नेपाल नम्वर १ बराह बाहिनीका बाहिनीपति सशस्त्र प्रहरी नायव महानिरीक्षक नगेन्द्रबहादुर थापा तथा सखुंवासभा जिल्लाका प्रमुख जिल्ला अधिकारी जिवनप्रसाद दुलालले आज उक्त बिओपीको संयुक्त रुपमा उद्घाटन गरे ।

यो पोष्ट सीमानाका भन्दा एक किलोमिटर वर दुईवटा घर भाडामा लिई स्थापना गरिएको हो । उक्त बिओपीले आजैबाट दैनिक कार्य सुचारु गरेको छ । सशस्त्र प्रहरी बल नेपाल बोर्डर आउट पोष्ट किमाथाङका सदरमुकाम खाँदबारीबाट ११० किलोमिटर उत्तरतर्फ सीमा क्षेत्रमा स्थापना भएको हो । 

उक्त बिओपी सीमा ईलाकामा हुने चोरिनिकासी पैठारी नियन्त्रण, सीमा अपराध नियन्त्रण तथा सीमा स्तम्भको सुरक्षा लगायतका विभिन्न कामकारवाहीहरुमा परिचालित रहने छ । सशस्त्र प्रहरी निरीक्षकको कमाण्डमा आवश्यक बन्दोवस्तीका सामानसहित हेलीकप्टरद्वारा उक्त टोली त्यस ठाउँमा गएको हो ।

भारतीय रुपैयाँसहित पक्राउ 
यता महोत्तरी जिल्लाको जलेश्वर नगरपालिका ७ स्थित हलखोरीबाट एपीएफ टोलीले सात लाख ९७ हजार भारतीय रुपैयाँसहित एक जनालाई पक्राउ गरेको छ । पक्राउ पर्नेमा सोही जिल्लाको सिस्वा नगरपालिका ४ जाउखा बस्ने ३६ वर्षिय संजयकुमार महतो छन् ।

उनलाई सशस्त्र प्रहरी बल, नेपाल जिल्ला कमाण्ड पोष्ट जलेश्वरबाट खटिएको एपीएफ टोलीले उक्त भारतीय रुपैयाँसहित पक्राउ गरेको हो ।

ज ३ प ९६१८ नम्बरको मोटरसाईकलमा सवार निज महतोलाई एपीएफ टोलीले शंका लागि जाँच गर्दा उनको साथबाट दुई हजार दरको ९४ वटा, पाँच सय दरको एक हजार दुई सय वटा र दुई सय दरको ४५ वटा भारतीय रुपैयाँ फेला परेपछि उनलाई पक्राउ गरिएको हो । एपीएफ टोलीले त्यसवेला उनको साथबाट दुई थान मोवाईल सेट तथा उक्त मोटरसाईकल समेत बरामद गरेको छ ।

एपीएफ टोलीले उनलाई बरामद रकम, मोवाईल तथा मोटरसाईकलसहित आवश्यक कारवाहीको लागि राजश्व अनुसन्धान कार्यालय पथलैया बारामा बुझाएको  ससस्त्रका प्रहरी नायव उपरीक्षक अजय छतकुलीले जानकारी दिनुभयो ।