ट्रम्पको सम्बोधन : इरानमाथि थप प्रतिबन्धको घोषणा

काठमाडौँ । अमेरिकाले इरानमाथि थप प्रतिबन्ध लगाउने घोषणा गरेको छ । अमेरिकी राष्ट्रपति डोनाल्ड ट्रम्पले नेपाली समयअनुसार बुधबार साँझ इरानको विषयलाई लिएर सम्बोधन गर्दै यस्तो घोषणा गरेका हुन् ।

उनले इरानी हमलामा अमेरिकी सेनालाई केही पनि नभएको बताए । इरानले इराकस्थित सैन्य बेसमा मिसाइल आक्रमण गरेपछि ट्रम्पले यो सम्बोधन गरेका हुन् । उनले भने, ‘केही सामान्य क्षति भयो। कोही हताहत भएनन्।’ उनले इरानी सैनिक कमान्डरलाई पहिले नै मारिनुपर्ने भन्दै ढिला गरी मार्नुपर्दा दुःख पनि व्यक्त गरे ।

गत शुक्रबार अमेरिकी ड्रोन आक्रमणमा परेर सैनिक कमान्डर कासिम सुलेमानी मारिएपछि इरान अमेरिकाबीच तनाव बढ्दो छ । ट्रम्पको सम्बोधनले थप युद्ध भने नहुनेजस्तो देखिएको छ ।

उनले आफूहरुसँग हतियार, मिसाइल सबै भएपनि आफूहरु सोको प्रयोग गर्ने पक्षमा नरहेको  बताए ।