विभिन्न स्थानमा भएको सवारी दुर्घटनामा ७ जनाको मृत्यु

काठमाडौं । काठमाडौं, भक्तपुर, चितवन, बारा र रुपन्देहीका विभिन्न स्थानमा भएका छुट्टाछुट्टै सवारी दुर्घटनामा परी ७ जनाको मृत्यु भएको छ । काठमाडौंको महानगरपालिका–१४ कलंकी मकालु पम्प नजिकै नम्बर नखुलेको टिपरको ठक्करबाट अन्दाजी ४० वर्षीय पुरुषको शिक्षण अस्पताल महाराजगंजमा उपचारको क्रममा सोमबार बिहान मृत्यु भएको छ ।

ठक्कर दिने सवारी साधनको प्रहरीले खोजी गरिरहेको छ । त्यस्तै भक्तपुरको भक्तपुर नगरपालिका –१ सृजनानगरस्थित सडकमा बा.३ ख २५३१ नम्बरको टिपरको ठक्करबाट गम्भीर घाइते पैदलयात्री उदयपुर हडिया–५ घर भएका २७ वर्षीय समिर विकको उपचारको क्रममा आइतबार राति मृत्यु भएको छ । दुर्घटना पश्चात फरार भएको टिपर र चालकलाई काठमाडौं तिनकुनेबाट प्रहरीले सोमबार बिहान नियन्त्रणमा लिएको हो ।

यसैगरी चितवनमा छुट्टाछुट्टै स्थानमा भएको सवारी दुर्घटनामा २ जनाको ज्यान गएको छ । चितवनको खैरहनी नगरपालिका –१० बडागाउँ स्थित भित्री सडकमा ना.५८ प ९४१ नम्बरको मोटरसाइकलको ठक्करबाट गम्भीर घाइते साइकलयात्री सोही ठाउँ बस्ने ५५ वर्षीय मदरा चौधरीको उपचारको क्रममा  जिल्ला अस्पताल भरतपुरमा मृत्यु भएको छ । भने भरतपुर महानगरपालिका–२९ खहरे पुल नजिक मुग्लिङ–नारायणगढ सडकमा नम्बर नखुलेको सवारी साधनको ठक्करबाट पैदलयात्री बर्दिया बाँसगढी–५ मगरागढीका ३३ वर्षीय सन्तराम थारुको सोमबार बिहान मृत्यु भएको छ । ठक्कर दिने सवारी साधन र चालकको प्रहरीले खोजी गरिरहेको छ ।

यसैगरि बाराको सुवर्ण गाउँपालिका–८स्थित हर्दिया चोकमा बिआर ०५ क्यू ९११३ नम्बरको मोटरसाइकल अनियन्त्रित भई दुर्घटना चालक सोही ठाउँ बस्ने २० वर्षीय बृज प्रशाद यादवलाई उपचारको क्रममा मृत्य भएको छ । यसैगरी रुपन्देहीको बुटबल–१२ कलुवास्थित पूर्व–पश्चिम राजमार्गमा बिग्रिएर रोकी राखेको भे.१ क १४४८ नम्बरको टिपरमा ना.४३ प ३३४६ नम्बरको मोटरसाइकल ठोक्किएर आइतबार राति दुर्घटना हुँदा मोटरसाइकलमा सवार सैनामैना नगरपालिका बस्ने २९ वर्षीय दिपक पन्थ र ३१ वर्षीय नविन कडेंलको घटनास्थलमै मृत्यु भएको प्रहरीले जनाएको छ ।