छुट्टाछुट्टै सवारी दुर्घटनामा १३ जनाको मृत्यु

काठमाडौँ । विभिन्न जिल्लामा भएका सवारी दुर्घटनामा परेर १३ जनाको मृत्यु भएको छ । तनहुँ, सप्तरी, सिराहा लगायतका जिल्लामा भएका सवारी दुर्घटनामा परेर १३ जनाको मृत्यु भएको हो ।

तनहुँको व्यास नगरपालिका–५ स्थित सडकमा दमौलीबाट पोखरातर्फ जाँदै गरेको ग.२च ५७६० नम्बरको बोलेरो जिप गएराति मादी नदीमा खसेर दुर्घटना हुँदा जिपमा सवार ३ जनाको मृत्यु भएको छ । मृत्यु हुनेहरूमा व्यास नगरपालिका–५ बेतेनी बस्ने २८ वर्षीय प्रवीण आलेमगर, सोही नगरपालिका मानुङसोहरा बस्ने २२ वर्षीय कुशल थापा मगर र २२ वर्षीय कुमार थापामगर रहेका छन् । दुर्घटनामा गम्भीर घाइते भएका उनीहरूको प्रदेश अस्पताल दमौलीमा उपचारको क्रममा मृत्यु भएको हो । साथै दुर्घटनामा घाइते भएका जिपमा सवार १ जनाको मणिपाल अस्पताल पोखरामा उपचार भइरहेको छ । जिप चालकलाई प्रहरीले नियन्त्रणमा लिएको छ ।

त्यस्तै सप्तरीको  राजगढ गाउँपालिका–५ मलेखपुरस्थित सडकमा स १ त ५४४२ नम्बरको ट्याक्टरमा म.प्र.०२–०१९ प ९६२६ नम्बरको मोटरसाइकल ठक्कर खाई शनिबार दिउँसो दुर्घटना हुँदा मोटरसाइकलमा सवार विष्णुपुर गाउँपालिका–१ जमुनी मध्येपुरा बस्ने १९ वर्षीय सन्तोष यादव र २२ वर्षीय सागर मण्डलको मृत्यु भएको छ । दुर्घटनामा गम्भीर घाइते भएका उनीहरूको गजेन्द्रनारायण सिंह अस्पताल राजविराजमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनालाई छिन्नमस्ता अस्पताल राजविराज हुँदै थप उपचारको लागि न्युरो अस्पताल विराटनगर मोरङ रिफर गरिएको छ । हाल फरार ट्याक्टर चालकको प्रहरीले खोजी गरिरहेको छ ।

उता पर्साको वीरगन्ज महानगरपालिका–१७ अलौस्थित सडकमा ना.७ ख ९४२९ नम्बरको टिपरले बीआर ०५ एल ८१५९ नम्बरको मोटरसाइकललाई शनिबार दिउसो ठक्कर दिँदा मोटरसाइकल चालक वीरगन्ज महानगरपालिका–१६ नगवा टोल बस्ने २२ वर्षीय छोटु साह सोनार र मोटरसाइकलमा सवार सोही महानगरपालिका–२९ रतनपुर टोल बस्ने २९ वर्षीय शुकुरूला अंसारीको मृत्यु भएको छ । दुर्घटनामा गम्भीर घाइते भएका छोटु साहको पावर हाउसस्थित नीलकण्ठ अस्पतालमा र शुकुरूलाको नेशनल मेडिकल कलेज वीरगन्जमा उपचारको क्रममा मृत्यु भएको हो । टिपर चालकलाई प्रहरीले नियन्त्रणमा लिएको छ । त्यस्तै सिराहाको लक्ष्मीपुर पतारी गाउँपालिका–२ पोखरभिन्डास्थित सडकमा

पोखरभिन्डाबाट सरस्वती खोलातर्फ जाँदै गरेको स १ त ६६४३ नम्बरको ट्याक्टरबाट लडेर सोही गाउँपालिका–२ पोखरभिण्डा बस्ने ३० वर्षीय प्रदीप चौधरीको शनिबार साँझ मृत्यु भएको छ । दुर्घटनामा गम्भीर घाइते भएका उनको प्रादेशिक अस्पताल लहानमा उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ ।

उता, सल्यानको दार्मा गाउँपालिका–६ चौताराटोलमा रा. ७ प ७४९८ नम्बरको मोटरसाइकल अनियन्त्रित भई शनिबार राति दुर्घटना हुँदा चालक २१ वर्षीय जीवन विकको घटनास्थलमै मृत्यु भएको छ । बर्दिया, मधुबन नगरपालिका–८ लालसिंह चोकस्थित सडकमा भे–१३ प २६६९ नम्बरको मोटरसाइकल र भे–६ प ५४१ नम्बरको मोटरसाइकल एक आपसमा ठक्कर खाई शनिबार राति दुर्घटना हुँदा भे–१३ प २६६९ नम्बरको मोटरसाइकल चालक गुलरीया नगरपालिका–२ बस्ने २८ वर्षीय देवानन्द यादव र भे–६ प ५४१ नम्बरको मोटरसाइकल चालक मधुबन नगरपालिका–८ लालिबजार बस्ने ३० वर्षीय टंकबहादुर बिसीको मृत्यु भएको छ । दुर्घटनामा गम्भीर घाइते भएका उनीहरूको बर्दिया अस्पताल गुलरीयामा उपचारको क्रममा मृत्यु भएको हो । साथै दुर्घटनामा घाइते भएका भे–१३ प २६६९ नम्बरको मोटरसाइकलमा सवार १ जनालाई थप उपचारको लागि नर्सिङ होम नेपालगन्ज बाँके पठाइएको छ ।

त्यस्तै धनुषाको लक्ष्मीनिया गाउँपालिका–४ सपही पुलस्थित सडकमा महेन्द्रनगरबाट जनकपुरतर्फ जाँदै गरेको प्र–२–०२–००२ प ५९९७ नम्बरको मोटरसाइकल अनियन्त्रित भई शनिबार राति दुर्घटना हुँदा चालक जनकपुरधाम उपमहानगरपालिका–१ बस्ने २८ वर्षीय उपेन्द्र पासवानको मृत्यु भएको छ । दुर्घटनामा गम्भीर घाइते भएका उनको ट्रमा सेन्टर अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ ।

यता, लमजुङको मर्स्याङ्दी गाउँपालिका–३ खुदी बेँसीशहरमनाङ सडक खण्डमा ज–५ प ७०१६ नम्बरको मोटरसाइकल र बिएए ०६९९ नम्बरको बोलेरो जिप एक आपसमा ठक्कर खाँदा मोटरसाइकल चालक बेँसीशहर नगरपालिका–१० बस्ने ४५ वर्षीय याकम तामाङको मृत्यु भएको छ । दुर्घटनामा गम्भीर घाइते भएका उनको प्रदेश अस्पताल लमजुङमा उपचारको क्रममा मृत्यु भएको हो । जिप चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।