सरकारले महत्त्वाकाक्षी बजेट नै ल्याएको रास्वपाको दाबी

काठमाडौँ । राष्ट्रिय स्वतन्त्र पार्टी (रास्वपा) ले सरकारले आगामी आर्थिक वर्षका लागि प्रस्तुत गरेको बजेटलाई महत्त्वाकांक्षी भएको टिप्पणी गरेको छ ।

संघीय संसद् भवन परिसरमा सञ्चारकर्मीसँग प्रतिक्रिया दिँदै रास्वपाका प्रवक्ता मनिष झाले पार्टी नेतृत्व बजेटप्रति सकारात्मक रहेको बताए । उनका अनुसार पार्टी सभापति रवि लामिछाने तथा प्रधानमन्त्री बालेन शाह बजेटको समग्र दिशाप्रति उत्साहित छन् ।

प्रवक्ता झाले मुलुकलाई अघि बढाउन दीर्घकालीन र ठूलो सोचसहितका योजना आवश्यक पर्ने उल्लेख गर्दै सरकारले त्यसअनुसारको बजेट ल्याएको धारणा राखे ।

उनले निरन्तर सम्झौतामै आधारित नीति तथा कार्यक्रमले मात्र अपेक्षित परिवर्तन सम्भव नहुने भन्दै विकास र सुधारका लागि महत्त्वाकांक्षी लक्ष्य निर्धारण अपरिहार्य रहेको बताए ।

यद्यपि बजेट कार्यान्वयन चुनौतीपूर्ण रहने स्वीकार गर्दै उनले सरकारले तय गरेको परिकल्पनाअनुसार अघि बढ्ने लक्ष्य राखेको उल्लेख गरे ।