रास्वपाद्वारा बारामा जिल्ला तदर्थ समिति नबनाई स्थानीय अधिवेशनमा ध्यान केन्द्रित गर्ने निर्णय

काठमाडौँ । राष्ट्रिय स्वतन्त्र पार्टीले बारामा तत्काल जिल्ला तदर्थ समिति गठन नगर्ने निर्णय गर्दै वडा तथा पालिका तहको अधिवेशन सम्पन्न गर्ने प्रक्रियालाई प्राथमिकता दिएको छ ।

पार्टीले यसअघि बारा जिल्लाका संस्थापक सभापति चन्दन स्वर्णकारलाई पदमुक्त गरेको थियो । त्यसपछि विवादमा परेको जिल्ला समितिलाई विघटन गरी केन्द्रबाट प्रतिनिधि टोली खटाइएको जनाइएको छ ।

शनिबार केन्द्रीय नेताहरूको उपस्थितिमा आयोजित विस्तारित बैठकले नयाँ जिल्ला तदर्थ समिति गठन नगरी संगठनलाई वडा र पालिका अधिवेशनतर्फ केन्द्रित गर्ने निष्कर्ष निकालेको हो ।

बैठकले स्थानीय तहका अधिवेशन सम्पन्न भएपछि मात्रै जिल्ला अधिवेशन आयोजना गर्ने निर्णय गरेको जनाएको छ । सोअनुसार पालिका अधिवेशन आगामी जेठ १७ गतेका लागि तय गरिएको छ ।

त्यसअघि तदर्थ समिति गठन भइसकेका वडाहरूमा जेठ १२ गते अधिवेशन गर्ने तथा बाँकी पालिकामा जेठ १३ गतेभित्र तदर्थ समिति गठन प्रक्रिया पूरा गर्ने निर्णय गरिएको बताइएको छ ।

साथै, वडा तथा पालिका समिति गठनको कार्य समन्वय गर्न पाँच जना प्रतिनिधि खटाउने निर्णय पनि बैठकले गरेको जनाइएको छ ।