सभामुख भेट्न पुगे विपक्षी दलका नेताहरू

काठमाडौँ । संसदीय समितिहरूको सभापति चयन प्रक्रियासम्बन्धी धारणा तय गर्न प्रमुख विपक्षी दलहरूको संयुक्त बैठक प्रारम्भ भएको छ । नेपाली काँग्रेस, नेकपा एमाले र नेकपाबीच समन्वयका लागि बैठक बसेको हो ।

सिंहदरबारस्थित काँग्रेस संसदीय दलको कार्यालयमा भइरहेको छलफलमा अर्जुननरसिंह केसी, युवराज दुलाल, गुरुप्रसाद बराल तथा भीष्मराज आङ्दाम्बेलगायत नेताहरू सहभागी छन् ।

बैठकले संसदीय समितिका सभापतिहरूको चयनमा उम्मेदवारी दिने वा नदिने विषयमा साझा निर्णय गर्ने अपेक्षा गरिएको छ ।

यसैबीच, संघीय संसद् सचिवालयका अनुसार समितिका सभापतिहरूका लागि आज दिउँसो १ बजेदेखि ४ बजेसम्म उम्मेदवारी दर्ताको समय निर्धारण गरिएको छ । दर्ता प्रक्रिया प्रतिनिधिसभा सचिवको कार्यकक्षमा सम्पन्न हुनेछ भने सोही दिन अपराह्न साढे ४ बजे उम्मेदवारहरूको नामावली सार्वजनिक गरिनेछ ।

संघीय संसदअन्तर्गत हाल १६ वटा समिति क्रियाशील छन्, जसमा प्रतिनिधि सभातर्फ १०, राष्ट्रिय सभातर्फ ४ तथा दुई संयुक्त समिति रहेका छन् । राष्ट्रिय सभाका समितिहरूको नेतृत्व चयन यसअघि नै सम्पन्न भइसकेको छ भने प्रतिनिधिसभा र संयुक्त समितिहरूमा नेतृत्व चयन प्रक्रिया बाँकी रहेको छ ।

गत चैत २७ गते प्रतिनिधि सभाले समितिमा रहने सदस्यहरूको नामावली टुङ्ग्याएको थियो । त्यसलगत्तै सभामुख डोलप्रसाद अर्यालले समितिका सभापति चयनका लागि आगामी शुक्रबार निर्वाचन मिति निर्धारण गरेका थिए ।