४० अर्ब रुपैयाँ दीर्घकालीन निक्षेप संकलन गर्दै राष्ट्र बैंक

काठमाडौँ । नेपाल राष्ट्र बैंकले वित्तीय प्रणालीमा बढी तरलता कायम रहँदा आइतबार ४० अर्ब रुपैयाँ दीर्घकालीन निक्षेप संकलन गर्न लागेको छ। यो कदम २१ दिन अवधिका लागि बोलकबोल प्रक्रिया मार्फत कार्यान्वयन हुने छ।

केन्द्रीय बैंकका अनुसार हाल कुल निक्षेप ७७ खर्ब रुपैयाँभन्दा बढी पुगेको छ। वित्तीय प्रणालीमा अधिक तरलता व्यवस्थापन र बजार ब्याजदर नियन्त्रणका लागि राष्ट्र बैंकले नियमित रूपमा निक्षेप संकलन उपकरण र स्थायी निक्षेप सुविधाको प्रयोग गर्दै आएको छ।

बोलकबोल प्रक्रियामा ‘क’, ‘ख’ र ‘ग’ वर्गका इजाजतप्राप्त बैँक तथा वित्तीय संस्था मात्र सहभागी हुन पाउने छन्। दीर्घकालीन निक्षेप बाँडफाँट गर्दा काउन्टर पार्टीहरूले प्रस्ताव गरेको न्यूनतम ब्याजदरलाई प्राथमिकता दिँदै आह्वान गरिएको रकमसम्म क्रमशः वितरण गरिनेछ।

निक्षेप खरिद अनलाइन प्रणालीमार्फत हुनेछ भने ब्याजदर बोलकबोल प्रक्रियामा निर्धारण हुने छ। आइतबार संकलन हुने निक्षेपको सावाँ र ब्याज २०८३ वैशाख ६ गते भुक्तानी हुने राष्ट्र बैंकले जनाएको छ। बोलकबोलमा न्यूनतम १० करोड र अधिकतम ५ करोड रुपैयाँको अंक विभाजन गरी बाँडफाँट गरिनेछ।

केन्द्रीय बैंकको खुला बजार सञ्चालन नियम अनुसार वित्तीय बजारमा दीर्घकालीन तरलता व्यवस्थापन र ब्याजदर नियन्त्रण आवश्यक भएमा बढीमा ६ महिना अवधिका लागि दीर्घकालीन निक्षेप संकलन उपकरण प्रयोग गर्न सकिने व्यवस्था रहेको छ। यही व्यवस्था प्रयोग गर्दै राष्ट्र बैंकले पटक पटक बजारमा तरलता व्यवस्थापन गर्दै आएको छ।