तनहुँमा तीन जनाको बीभत्स हत्या, घटना रहस्यमय

कास्की । तनहुँको शुक्लागण्डकी नगरपालिका–५, कसेरीघाटस्थित निर्माणाधीन फोहोरमैला प्रशोधन केन्द्र परिसरमा शनिबार बिहान तीन जनाको शव फेला परेको घटना अझै रहस्यमय बनेको छ । 

शवको प्रकृति हेर्दा धारिलो हतियार प्रयोग गरी बीभत्स हत्या गरिएको देखिए पनि घटनामा संलग्न र कारणबारे प्रहरी कुनै निष्कर्षमा पुग्न सकेको छैन । प्रहरीले प्रविधि र तालिमप्राप्त कुकुरसहित अनुसन्धान अघि बढाएको छ ।

शनिबार बिहान फेला परेका तीन शवमध्ये एक जनाको सनाखत भएको छ । मृतकमध्ये शुक्लागण्डकी–११ पाल्पालीछापका अन्दाजी ४० वर्षीय नारायण विकको पहिचान खुलेको हो । उनी सोही प्रशोधन केन्द्रमा सुरक्षा गार्डका रूपमा काम गर्दै आएका थिए । घटनास्थलमा फेला परेका अन्य एक पुरुष र एक महिलाको भने अहिलेसम्म पहिचान खुल्न सकेको छैन । उनीहरू फोहोर सङ्कलन गरेर गुजारा चलाउँदै आएको बुझिएको छ ।

घटनास्थलको प्रकृति अत्यन्तै बीभत्स देखिएको छ । दुई जना पुरुषको पेटमा धारिलो हतियार प्रहार गरी चिरिएको अवस्थामा शव भेटिएको थियो । तीमध्ये एक जना टेन्टभित्र र अर्को बाहिर मृत फेला परेका थिए । 

महिलाको शव भने पुरुषको शव भेटिएको स्थानभन्दा करिब ७ सय मिटर तल खोलामा फेला परेको थियो । उनको घाँटी रेटेर हत्या गरिएको प्रहरीले जनाएको छ । घटनास्थलमा हत्यामा प्रयोग भएको हतियार फेला नपरेकाले अनुसन्धान थप जटिल बनेको छ ।

जिल्ला प्रहरी कार्यालय तनहुँका प्रवक्ता डीएसपी श्रवणकुमार विकका अनुसार प्रहरीको सम्पूर्ण संयन्त्र घटनाको अनुसन्धानमा केन्द्रित छ । प्रारम्भिक अनुसन्धानका क्रममा प्रहरीले तालिमप्राप्त कुकुरको प्रयोग गरेको थियो । कुकुर शव भएको स्थानबाट फोहोर प्रशोधन केन्द्र, क्याम्पस बस्ती हुँदै पृथ्वीराजमार्गसम्म पुगेर अलमलिएको थियो । यसका आधारमा हत्यामा संलग्नहरू घटनापछि राजमार्गबाट गाडी चढेर भागेको हुन सक्ने प्रहरीले अनुमान गरेको छ ।