दैलेखमा मादक पदार्थ सेवन गरेका बाबुले गरे आफ्नै छोराको हत्या

दैलेख । दैलेखमा मादक पदार्थ सेवनपछि भएको पारिवारिक विवादले उग्र रुप लिँदा एक बाबुले आफ्नै छोराको विभत्स हत्या गरेका छन् ।

जिल्लाको नारायण नगरपालिका-९ सालखर्कमा मंगलबार राति ७० वर्षीय बाबु कबिराज थापाले आफ्नै ४५ वर्षीय छोरा यादव थापाको धारिलो हतियार खुर्पा प्रहार गरी हत्या गरेका हुन् ।

मदिराको नसामा भएको सामान्य भनाभनले ज्यानै लिने अवस्थासम्म पुगेको यो घटना मंगलबार राति करिब ११ बजेतिरको हो । प्रहरीका अनुसार रातिको समयमा बाबुछोराबिच पारिवारिक विषयमा सामान्य विवाद सुरु भएको थियो । मादक पदार्थ सेवन गरेका कारण दुवै जना आवेगमा आएपछि बाबु कबिराजले रिसको झोकमा घरमा रहेको खुर्पाले छोरा यादवमाथि प्रहार गरेका थिए ।

धारिलो हतियारको प्रहारबाट गम्भीर घाइते भएका यादवलाई राति नै उद्धार गरी उपचारका लागि जिल्ला अस्पताल दैलेख लगिएको थियो । तर, उनको शरीरमा गम्भीर चोट लागेको र अत्यधिक रक्तश्राव भएका कारण अस्पताल पुर्‍याउनासाथ चिकित्सकहरुले जाँच गर्दा उनलाई मृत घोषणा गरेका थिए ।

घटनाको जानकारी पाउनासाथ तत्कालै खटिएको प्रहरी टोलीले हत्यामा संलग्न बाबु कबिराज थापालाई घटनास्थलबाटै नियन्त्रणमा लिएको छ । प्रहरीले हत्यामा प्रयोग गरिएको रगत लतपतिएको खुर्पा पनि बरामद गरेको छ । जिल्ला प्रहरी कार्यालयले घटनाको मुचुल्का उठाई थप कानुनी प्रक्रिया अगाडि बढाएको छ ।