राप्रपा नेपालले बोलायो केन्द्रीय समितिको अन्तिम बैठक

काठमाडौँ । राप्रपासँग एकताको सहमति गरेको राप्रपा नेपालले आगामी पुस १५ गते केन्द्रीय समितिको बैठक बोलाएको छ । सम्भवतः यो राप्रपा नेपालको अन्तिम बैठक हुनेछ ।

बैठक दिउँसो १:०० बजे नवदुर्गा पार्टी प्यालेस सुकेधारामा बस्ने राप्रपा नेपालका महामन्त्री राजाराम बर्तौलाले जानकारी दिए । बर्तौलाका अनुसार राप्रपा र राप्रपा नेपालबीच पुस १६ गते हुने पार्टी एकता घोषणा सभालाई भव्य बनाउने विषयमा बैठक केन्द्रित हुनेछ ।

राप्रपा र राप्रपा नेपालबीच पार्टी एकता गर्ने सहमति पत्रमा राप्रपा अध्यक्ष राजेन्द्र लिङ्देन र राप्रपा नेपालका अध्यक्ष कमल थापाले हिजो हस्ताक्षर गरेका थिए । महामन्त्री बर्तौलाका अनुसार केन्द्रीय समितिको बैठकमा अध्यक्ष थापाले पार्टी सञ्चालनका क्रममा पाएको सहयोग र सद्भावको निमित्त सबै नेताहरूमा धन्यवाद सहित आभार व्यक्त गर्नेछन् ।