ओलीतिर फर्किदै असन्तुष्ट नेताहरु

काठमाडौं । नेकपा एमालेभित्र केपी ओली पक्षधर असन्तुष्ट नेताहरु फेरि ओलीतिरै फर्किन थालेका छन् ।

पदीय व्यस्थापनमा ओलीले आफुहरुलाई अन्याय गरेको र वरिपरि घुमिरहनेहरुलाई मात्र च्यापेर उम्मेदवार बनाएको आरोपसहित झण्डै एक दर्जन ओलीतिरका नेता असन्तुष्ट बनेका थिए । 

खासगरी ओलीसँग निरन्तर रहेका प्रदीप ज्ञवाली, राजेन्द्र गौतम, कृष्णगोपाल श्रेष्ठ, अग्नि खरेल, गोकुल बास्कोटा लगायतका नेताहरुले ओलीको उम्मेदवार ब्यवस्थापनमा असहमति जनाएका थिए ।

जसकाकारण प्रदीप ज्ञवालीले उपाध्यक्ष पद अश्वीकार गरेर केन्द्रीय सदस्यमा मात्र उम्मेदवारी दर्ता गराएका थिए । काशीनाथ अधिकारीले कतै उम्मेदवारी नै दर्ता गराएनन । प्रचार विभाग प्रमुख रहेका राजेन्द्र गौतमले उपमहासचिवमा उम्मेदवारी दिएका थिए ।

कृष्णगोपाल श्रेष्ठ र गोकुल बास्कोटा ओली क्याम्प छोडेर इश्र पोखरेलको टिममा पुगेर पदाधिकारीमा उम्मेदवारी नै दिए । अग्नि खरेलले सचिवमा उम्मेदवारी दिए तर कतै टिममा लागेनन । 

यी नेताहरु मध्ये केही नेताहरु फेरि ओलीतिर नै फर्केका छन् । प्रदीप ज्ञवालीले आफुलाई केन्द्रीय सदस्यमा मत माग्दै ओली र उनका टिमका नेताहरुलाई जिताउन अपिल गरेका छन् । त्यस्तै राजेन्द्र गौतमले उपमहासचिव पदबाट उम्मेदवारी फिर्ताको घोषणा गरेका छन् । 

उमेदवारको अन्तिम नामावलीमा भने उनको नाम छ । तर, उनले अन्तिम नामावली प्रकाशन भइसकेपछि आफू उमेदवार नरहेको बताएका हुन् । ओलीले उम्मेदवारी फिर्ता लिएर सहयोग गर्न उनीसँग पनि आग्रह गरेपछि उनले उम्मेदवारी फिर्ताको घोषणा गरेका हुन् । “मैले उपमहासचिव पदमा दिएको उमेदवारी फिर्ता लिएँ,” गौतमले भने । 

काशीनाथ अधिकारीले पनि आफुले कँही उम्मेदवारी नदिएपनि ओली टिमलाई मतमा सहयोग गर्ने बचन दिएका छन् ।