एमाले महाधिवेशन : चितवनको पूनरावृत्ति गराउने ओलीको तयारी

काठमाडौं । नेकपा एमालेको एघारौं महाधिवेशन सुरु हुन ३ दिन बाँकी छ । तयारी हेर्दा अध्यक्ष केपी ओलीले यो पटकको महाधिवेशन पनि दशौं महाधिवेशन जस्तै बनाउने तयारी गरेका छन् । 

त्यो भनेको अध्यक्ष केपी ओलीले सर्वसम्मत नेतृत्वका बारेमा सूची बनाउने र त्यसमा कोही कसैले नमाने दशौं महाधिवेशनमा भीम रावललाई जसरी ब्यवहार गरिएको थियो, त्यसैगरी इतर पक्षलाई पनि ब्यवहार गर्ने रणनीति ओलीले बनाएका छन् । 

एमालेका धेरै नेताहरु अहिले भन्न थालेका छन्, महाधिवेशन चितवन भाग २ जस्तै गरी सम्पन्न गर्ने गरी ओलीले तयारी गरेका छन् । ओली एमालेको फेरि तेहेरिएर अध्यक्ष बन्ने तयारीमा छन् । तर उनलाई सजिल्यै अध्यक्ष हुन नदिन वरिष्ठ उपाध्यक्ष इश्वर पोखरेल लगायतका वर्तमान कार्यसमितिका ६ जना पदाधिकारीसहित मोर्चा बनाएका छन् । 

उनीहरुले अब ओली अभिभावक भएर बस्नुपर्ने र नेतृत्व हस्तान्तरण गर्नुपर्ने पक्षमा छन् । उनीहरुले गत भदौं २३ र २४ को आन्दोलनपछि विकसित राजनीतिक घटनाक्रमका बारेमा समीक्षा हुनुपर्ने, नेतृत्व एकलौटी चलाउने कुराबाट सामुहिकतामा जाृड दिनुपर्ने लगायतका विषय पार्टीभित्र बहसका रुपमा उठाएका छन् । तर, ओली उनीहरुले पार्टीभित्र राखेको मतलाई छलफल समेत गर्न दिने पक्षमा छैनन । 

ओली पक्षले इतर पक्षलाई चेतावनीकै शैलीमा धम्की दिएको छ, धेरै निहुँ खोजे भीम रावल बन्ने हो ? एमालेमा फरक मत राख्ने नेताहरु ओली अध्यक्ष बनेपछि टिकेका छैनन । माधव नेपाल, झलनाथ खनाल, वामदेव गौतम, भीम रावल, घनश्याम भुषाल लगायत फरक मत राखेका नेताहरु पार्टीबाटै बाहिरिनुपर्ने अवस्था निम्तेको थियो । अहिले इश्वर पोखरेल, सुरेन्द्र पाण्डे, योगेश भटटराई, अष्टलक्ष्मी शाक्य, युवराज ज्ञवाली, गोकर्ण विष्ट लगायत नेताहरुलाई ओलीले अप्रत्यक्ष ढंगले आफु र निकट नेतामार्फत त्यस्तै धम्की दिइएको छ ।

अझ ओली पक्षले पोखरेल पक्षले अगाडी सारेको विचार, अवधारणालाई पार्टीले पहिले नै आफनो दस्तावेजमा सम्वोधन गरिसकेको टिप्पणी गरेको छ । उसले पार्टीभित्रै प्रतिपक्षी मत बनाईरहेका नेताहरुले विगतका पार्टी दस्तावेज अध्ययन नै नगरेको आरोप समेत लगाउन थालेको छ । 

‘कुनै पनि विषय अगाडि सार्नुपूर्व आफ्ना दस्तावेजहरू त अध्ययन गर्नु पर्‍यो। दस्तावेजले भनेको चिजलाई ओझेलमा पारेर नयाँ कुरा गरेजस्तो गर्नु उचित होइन । भदौं २३ र २४ गते पछाडिको परिस्थितिका सन्दर्भका बारेमा छलफल गर्नुपर्छ भनेर उहाँ (इश्वर पोखरेल) ले जे माग गर्नुभएको छ, बाहिर पनि बोलिराख्नु भएको छ । त्यसका लागि त हामीले असोज २९, ३०, ३१ गते दशौं केन्द्रीय कमिटीको बैठक बसेर ३२८ जना वक्ता बोलेर गरेको निर्णयको मसी सुकेको छैन नि, सुकेको छ र ?’ एमाले महासचिव शंकर पोखरेलले प्रश्न गदैं भने । 

२३, २४ पछाडिको परिस्थितिको पार्टीले विश्लेषण नै गरेको छैन, पुरानो दस्तावेज बोकेर कसरी जानु सकिन्छ भन्ने पोखरेल पक्षले उठाएको विषय सत्य नभएको शंकर पोखरेलले बताएका छन् । ‘उहाँहरुले कुनै नयाँ कुरा गर्नुभएको छैन । महाधिवेशन त नेतृत्व निर्वाचनको महाधिवेशन हो । त्यसमा कुनै दस्तावेजको विषय प्रवेश गर्दैन ।’ महासचिव पोखरेलले भने । 

ओलीले महाधिवेशनमा आफ्नो तर्फबाट एउटा प्यानल प्रस्ताव गर्ने र त्यसैमा सहमति खोजाउने प्रयास गर्ने तयारी गरेका छन् । उनले त्यसमा सहमति नबने महाधिवेशन प्रतिनिधिहरुका बीचमा जसले सहमति जनाउँदैन, उसैलाई मत नदिन चितवनमा जस्तै चिट बाँढ्ने तयारी गरेका छन् ।