राष्ट्रिय स्वतन्त्र पार्टी केन्द्रीय समितिको निर्णय सार्वजनिक

काठमाडौ । राष्ट्रिय स्वतन्त्र पार्टी (रास्वपा) केन्द्रीय समितिको विशेष भर्चुअल बैठकले विवेकशील साझा पार्टीसँग हुने एकीकरण प्रक्रियालाई औपचारिक रूपमा अघि बढाउने निर्णय गरेको छ।

महामन्त्री कवीन्द्र बुर्लाकोटीका अनुसार, आज २०८२ मङ्सिर १२ गते बसेको बैठकले विवेकशील साझा पार्टीद्वारा आएको एकीकरणको सर्वसम्मत प्रस्तावलाई सहर्ष स्वागत गरेको छ। आगामी मङ्सिर १४ गते आइतबार राष्ट्रिय सभागृहमा ‘एकता घोषणासभा’ आयोजना गरिने उनले जानकारी दिए।

उनका अनुसार, असल शासन र समुन्नतिसँग सरोकार राख्ने सुसंस्कृत तथा परिवर्तनकामी राजनीतिक शक्तिहरुसँग मुद्दागत र सांगठनिक सहकार्यका फरक–फरक मोडेल अपनाउने पार्टीको नीति अझ सुदृढ बनाइएको छ।

यसै क्रममा, २०८२ मङ्सिर ३ गते केन्द्रीय समितिबाट दिइएको निर्देशनअनुसार पार्टी सचिवालयले गठन गरेको सङ्घीय नेतृत्व मञ्च (Federal Leadership Forum) लाई आजको बैठकले औपचारिक रूपमा अनुमोदन गरेको महामन्त्री बुर्लाकोटीले बताए।

उनका अनुसार, संवाद प्रक्रियालाई संस्थागत र प्रभावकारी बनाउन उक्त संयन्त्रले महत्वपूर्ण भूमिका खेल्नेछ।