धनगढीमा एमाले नेता महेश बस्नेतविरूद्ध प्रदर्शन

काठमाडौं । नेकपा एमालेका पोलिट्ब्युरो सदस्य महेश बस्नेत कैलालीको धनगढीतिर लागेका छन् । एमाले उपमहासचिव पृथ्वी सुब्बा गुरुङलाई पनि साथमा लिएर उनी जहाजमा धनगढीतिर लागेका हुन् ।

उनी धनगढी आउने थाहा पाएपछि युवाहरूको एउटा समूह प्रदर्शनमा उत्रिएको छ । जेन-जी युवाहरूको एउटा समूह धनगढीको डिभोटी होटल आसपासको सडकमा प्रदर्शनमा उत्रिएपछि बाक्लो संख्यामा प्रहरी तैनाथ गरएको छ।

उनीहरू धनगढी बजार क्षेत्रको सडकमा प्लेकार्डसहित बस्नेतविरुद्ध प्रदर्शनमा उत्रिएका हुन् ।

जेन-जी आन्दोलनपछि सबैभन्दा पहिले एमालेको तर्फबाट बोलेर सडकमा उत्रिने उनै बस्नेत हुन् ।

बस्नेत यसबीचमा कोशीसहितका प्रदेशमा पुगिसकेका छन् । विरोधको सामना गर्दै उनले एमाले र युवा संघलाई चलायमान बनाउने अभियान चलाएका छन् ।

देशका विभिन्न भूभागमा उनी पुगिरहँदा विरोध पनि भइरहेको छ। उनको विरोधका नाममा बाराको सिमरामा हिंसात्मक झडप नै भएको छ। उता विराटनगरमा पनि उनी सवार गाडीमा जेन-जीका नाममा कांग्रेसनिकट युवाहरूले रातो रंग हानेका थिए ।