प्रहरीले भन्यो– आईजीपीले राजीनामा दिने कुरा भएको छैन

काठमाडौँ । नेपाल प्रहरीले प्रहरी महानिरीक्षक (आईजीपी) चन्द्र कुबेर खापुङले राजीनामा दिने विषयमा कुरै नगरेको स्पष्ट पारेको छ । 

विभिन्न सञ्चार माध्यमहरूमा आएका समाचारहरूको खण्डन गर्दै प्रहरीले शुक्रबार विज्ञप्तिमार्फत यस्तो बताएको हो ।

प्रहरी नायब महानिरीक्षक तथा केन्द्रीय प्रहरी प्रवक्ता विनोद घिमिरेले शुक्रबार जारी गरेको प्रेस विज्ञप्तिमा भनिएको छ, ’केही दिन यता विभिन्न पत्र पत्रिकाहरू र सञ्चार माध्यमहरूमा प्रकाशित वा प्रसारित प्रहरी महानिरीक्षक चन्द्र कुबेर खापुङले “पूर्व प्रधानमन्त्री के. पी. शर्मा ओली र पूर्व गृहमन्त्री रमेश लेखकलाई पक्राउ गर्न दबाब सृजना गरिए वा बाध्य बनाइए राजीनामा दिन्छु” भनेको भन्ने आशयका भ्रामक समाचारहरूको सम्बन्धमा नेपाल प्रहरी प्रधान कार्यालयको गम्भीर ध्यानाकर्षण भएको छ । प्रहरी महानिरीक्षकज्यूले कहीँ कतै त्यस्तो आशय झल्कने अभिव्यक्ति नदिएको जानकारी गराउँदै सम्माननीय प्रधानमन्त्रीज्यू र माननीय गृहमन्त्रीज्यूसँग भएका सुरक्षा बैठक र प्रतिवेदनहरूमा समसामयिक घटनाक्रमहरू वा सोबाट सृजित सुरक्षा चुनौतीहरूको बारेमा विश्लेषण गर्दै शान्ति सु–व्यवस्था कायम गर्ने विषयमा मात्र केन्द्रित भई सौहार्दपूर्ण छलफल गरेको व्यहोरा सम्बन्धित सबैलाई सूचित गरिएको छ।