ट्रम्प-पुटिन वार्ता हुनुअघि अमेरिका र बेलायतले गरे युक्रेनसँग बैठक

एजेन्सी । अमेरिकाका उपराष्ट्रपति जेडी भान्स र बेलायतका विदेशमन्त्री डेभिड लामीले युक्रेन युद्धबारे सुरक्षा अधिकारीहरूसँग छलफल गरेका छन्।

बीबीसीका अनुसार बैठक शनिबार लन्डननजिकैको केन्टमा रहेको लामीको आधिकारिक निवासमा भएको हो । बैठकमा युक्रेनको राष्ट्रिय सुरक्षा तथा रक्षा परिषद्का सचिव रुस्तम उमरोभ, जेलेन्स्कीका कार्यालय प्रमुख एन्ड्री येर्माक र बेलायत, अमेरिका, युरोपेली संघ, फ्रान्स, जर्मनी, इटाली, फिनल्यान्ड र नेटोका अधिकारीहरू उपस्थित थिए।

उक्त बैठक अमेरिकाको पहलमा बोलाइएको बताइएको छ।बैठकमा युरोपका युक्रेनी अधिकारीहरू र राष्ट्रिय सुरक्षा सल्लाहकारहरू पनि उपस्थित थिए।लामीले भने, ‘युक्रेनलाई बेलायतको पूर्ण समर्थन छ र हामी न्यायपूर्ण र दिगो शान्तिका लागि काम गरिरहनेछौँ।’

उक्त अभिव्यक्ति युक्रेनका राष्ट्रपति भोलोदिमिर जेलेन्स्कीले रुसलाई आफ्नो कुनै पनि भूमि नदिने बताएका बेला आएको हो। अमेरिकाका राष्ट्रपति डोनाल्ड ट्रम्प र रुसका राष्ट्रपति भ्लादिमिर पुटिनबीच आउने शुक्रबार अलास्कामा युक्रेनका विषयमा वार्ता गर्दै छन्।

त्यसअघि जेलेन्स्कीले युक्रेनले आफ्नो जमिन नछाड्ने अडान व्यक्त गरेका हुन्।